"Et ass kee glécklech, fir laang an der Psychiatrie ze sinn", esou de Marc Graas am 100,7-Interview. D'Psychiatrie kéint eng Léisung si fir e puer Méint, duerno wär et awer wichteg, "erëm erauszegoen, zréck an d'Liewen, oder an e Wunnberäich, an dem ee sech besser kann entwéckelen."
Et feelt u Strukturen
Fir verschidden Zorte vu Patiente géing et awer baussent der Psychiatrie un adaptéierte Strukture feelen, seet de Generaldirekter vum CHNP: "Dat kann, zum Beispill, e jonke Schizophren sinn, fir dee mir en Appartement thérapeutique sichen, wou et dann zwee Joer dauert, bis eent fräi ass." Och fir eeler demenzkrank Patienten géif et net genuch Plazen a Fleegeheemer ginn.
Déi therapeutesch Aarbecht gëtt gebremst
Dat géif den CHNP deelweis an der therapeutescher Aarbecht bremsen, fir déi d'Spidol u sech responsabel ass: "Mir hu ganz vill gutt ausgebilte Leit, déi léiwer rehabilitativ, psychotherapeutesch oder psychiatresch mat Patiente géife schaffen, wéi Leit opzehuelen, déi eigentlech net méi an eng Klinik gehéieren."
Fir d'Situatioun ze verbesseren, wär virun allem d'Intelligenz vun de verschiddenen Acteuren aus dem Secteur gefuerdert, esou de Marc Graas. Hei misst weider un der Koordinatioun tëscht de verschiddene Spideeler, Asblen a Wunnberäicher aus dem Secteur geschafft ginn.