Et gëtt gehofft datt dono d’Betribssteier nach eng Kéier erofgesat gëtt. Aktuell wiere Lëtzebuerg bei der Betribsbesteierung am Ranking éischter am leschten Drëttel. Et misst een nees fiskal gesi méi attraktiv gi fir d’Betriber betount de Carlo Thelen, Generaldirekter vun der Chambre de Commerce.
Weider Schrëtt ginn erwaart
Et wier kloer datt een dat net kéint an engem Schratt maachen, dofir wier d’Annonce vum Finanzminister schonn ee positiivt Zeeche. Et géif ee sech och weider Schrëtt erwaarden.
„An dann hoffe mer effektiv, datt bei de Betriber selwer nach een oder en anere Prozentpunkt eng Kéier kann dobäikommen, well och mat engem Prozent si mer nach net an deem europäesche Mëttelfeld dran.“
Als kleng an oppe Wirtschaft misst een ëmmer déi bescht Positioun viséieren, well ee soss riskéiert un Attraktivitéit ze verléieren.
Suen net mat der Géisskan verdeelen
De Finanzminister hat an enger Chamberkommissioun präziséiert, datt déi Baisse, vun engem Prozentpunkt ee Minus vun 100 Milliounen Euro u Recettë géing ausmaachen. De Carlo Thelen mengt awer datt een duerch nei Aktivitéiten, déi Perte kann ausgläichen.
A wat de Budgetären Defizit ugeet esou mengt de Carlo Thelen, misst opgehale gi mat der Géisskan d’Suen ze verdeelen, et misst ee méi geziilt handelen.
„Déi Hëllefe sollen alleguer cibléiert sinn. Mir sinn net derfir, datt soll generell fir d'Leit, fir d’Betriber am Allgemengen an der Gesellschaft, de Staat, fir alles muss Sue mam Arrosoir verdeelen, dat soll schonn alles cibléiert sinn, dat soll een Incentif sinn, fir eng Aktivitéit unzefänken.“
Spuer Potential beim Staat géif et ginn, seet den Carlo Thelen, dëst am Kontext vun der Digitaliséierung, wou een och d’Prozedure ka vereinfachen.