D’CSV wier eng Partei, déi eng ganz staark Sozialpolitik géif maachen, et wier déi “eenzeg grouss Vollekspartei”, esou Aussoe vum Luc Frieden a senger Ried virum Vott.
Als nei CSV-Vizepresidente vun der Regierungspartei goufen um Kongress d’Ministerin Martine Hansen mat ronn 96 Prozent an den Escher Buergermeeschter Christian Weis mat ronn 97 Prozent gewielt.
Déi nei Generalsekretäre vun der CSV heesche Françoise Kemp an Alex Donnersbach. Si goufen zesumme mat knapp 95 Prozent gewielt.
Um CSV-Nationalkongress zu Hesper waren ënner anerem och déi geopolitesch Situatioun an d’Europawalen een Theema. D’CSV wënscht sech, datt d’Partei an Zukunft erëm dräi Vertrieder an dat Europäescht Parlament ka schécken, mat iwwer 30 Prozent bei de Walen den 9. Juni, esou d’Zil.