Fir déi “grouss a ganz performant” Finanzplaz weider ze entwéckele soll ënner anerem op de Beräich Fintech gesat ginn, esou d’Rapportrice. Néideg dofir wier et, Start-Upen an dat néidegt Fachpersonal op Lëtzebuerg ze lackelen, esou d’Diane Adehm.
Méi steierlech Attraktivitéit
Fir datt dat geléngt, misst och de steierleche Kader méi attraktiv gemaach ginn.
„Dozou gehéiert sécherlech eng Baisse vun der Kollektivitéitssteier, awer och d’Opsetze vun engem Expat-Regime oder spezifesch Regimmer vu Primes participatives.“
Bei der Steierklass 1 wier Lëtzebuerg net konkurrenzfäeg. Dat selwecht géif fir de Beräich vum Risikokapital gëllen.
„An do musse mir eis Gedanke maachen, wéi mir eis Finanzplaz fir dës Zort vun Investisseuren, méi attraktiv gestalte kënnen.“
Wirtschaft Diversifizéieren
Méiglechkeete fir d’Wirtschaft méi generell ze diversifizéiere gesäit d’Diane Adehm an de Beräicher kënschtlech Intelligenz, Cybersécherheet oder am Beräich vun den Dronen.
„Wa mir déi néideg Mëttel hei zu Lëtzebuerg hunn, se ze steieren, kéint ee sech jo iwwerleeën, ob ee se net och hei baue kéint."
Dronen hätte souwuel zivil, wéi militäresch eng Villzuel un Applikatiounen.
„Datenzenter vu Format“
Fir datt Lëtzebuerg een Technologie-Hub kéint ginn, wier och een “Datenzenter vu Format” néideg, esou d’Budgetsrapportrice.
„Souzesoen, een Datenzenter vu Google, fir eis Visibilitéit an eis Kredibilitéit am Ausland weider auszebauen. Déi lescht Noriichte vu Google ware jo positiv. An ech hoffen dës Regierung huet Erfolleg, wou déi viregt versot huet.“