De Schwéierpunkt vum Rapport vun der Corinne Cahen läit op der kënschtlecher Intelligenz. No 10 Joer als Familljeministesch e Karriärswiessel a Richtung Digitales? D'KI hätt mat allem ze dinn, esou d'Corinne Cahen.
"Ech hunn Iech d'Beispill gesot vun deene Leit, déi e bëssen ofgehaange waren, vläicht beim Internet. Ech kann Iech aner Beispiller soen, wéi zum Beispill autistesch Kanner an der Behënnerung. Do ka kënschtlech Intelligenz immens hëllefen, och bei Demenz erkrankte Leit. Flüchtlingen, déi op Lëtzebuerg kommen, déi op eemol kënne Formulairen ausfëlle vun enger Sprooch, déi se net verstinn."
Als Politiker misst ee kucken, d'Welt besser ze maache fir déi, déi dra liewen, esou d'Corinne Cahen. An d'KI wier eng Méiglechkeet, fir deem Zil nozegoen.
