E Mëttwoch um 14:30 ginn déi 133 walberechtegt Kardineel an engem Cortège an déi sixtinesch Kapell fir de Konklav. Hei leet all Kardinol eenzel den Eed of, sech un d’Virschrëften ze halen a sech net op Amëschung vu baussen anzeloossen. Fir déi Kardineel heescht dat bis zu Entscheedung: Keen Handy, keen Internet, keng Noriichten.
Dauer vum Konklav ongewëss
D’Walversammlung gëtt geleet vum ranghéchste Kardinol Pietro Parolin. De 70 Joer ale Kardinolsstaatssekretär zielt och als ee vun de Favoritten. Haut um éischten Dag vum Konklave gëtt et nëmmen ee Walgang, bei deem een op den Damp ka waarden. Schwaarzen Damp heescht et gëtt weider gewielt, wäissen Damp heescht et gouf en neie Poopst fonnt. Wéi laang de Konklave wäert daueren ass oppen.
Fir eng Entscheedung ass eng Zwee-Drëttel-Majoritéit, also 89 Stëmmen, néideg. An de leschte Joerzéngten hat de Konklav ronn 2 bis 3 Deeg gedauert.
Rekordzuel u Kardineel beim Konklav
Vu muer Donneschdeg u ginn et maximal véier Votte pro Dag. Damp ass muer am Dag no 10:30 an no 12 Auer méiglech. Och owes no 17:30 an no 19:00 Auer.
Hebergéiert sinn d’Kardineel wärend dem Konklav traditionell an der Casa Santa Marta, dem Gästehaus vum Vatikan. Well déi awer net grouss genuch ass fir déi 133 walberechtegt Kardineel, ass een Deel an engem méi alen Ubau ënnerbruecht.
Nach ni goufen et esou vill Kardineel bei der Wal, wéi dës Kéier.
