D’Requête vun engem Concernéierte virum Verwaltungsgeriicht huet d’lescht Woch awer dozou geféiert, datt hien eng Foyersplaz krut. Amplaz datt nach weider esou Requêten nokommen, misst elo um Terrain gehandelt ginn.
A wann et keen aner Moyen géif ginn, fir d’Gemengen dozou ze beweegen, méi Migranten opzehuelen, da misst ee vläicht awer op de Wee vun engem Quotesystem goen, esou nach de Sergio Ferreira. Dat wier sécher net "den ideaalste Wee“, mee wann d‘Gemengen net pro-aktiv géife matmaachen, da misst ee vläicht op dee Wee goen.
De Sergio Ferreira rechent net mat engem Walerfolleg vun der ADR
Europawäit sinn am Hibléck op d‘Europawalen den 9. Juni rietspopulistesch bis rietsextreem Tendenzen um Virmarsch. De Sergio Ferreira ka sech awer net virstellen, datt riets Parteie méi staark wäerte gewielt ginn.
Lëtzebuerg wier een Immigratiounsland an ouni Immigrante wier déi Lëtzebuerger Situatioun eng aner, sozial, kulturell an ekonomesch.
"De Räichtum vu Lëtzebuerg ass och zum Deel vun der Migratioun komm.“
Och datt d‘ADR eventuell ee Sëtz am Europaparlament kéint kréien, gleeft de Sergio Ferreira net.
"Den Här Keup hat och gemengt, datt nom Referendum 2015 seng 80 Prozent op dat gewielte Resultat transposabel wieren. Dat war net de Fall.“