Der Véronique Faber hiert Mandat als Verwaltungsrotspresidentin vum Média de Service public 100,7, dem Etablissement public, deen de radio 100,7 bedreift, gouf fir fënnef Joer erneiert. De Verwaltungsrot huet dat a senger Sëtzung vum 20. September 2022 eestëmmeg beschloss.
Et ass fir d'éischt, datt d'Gesetz vum 12. August 2022, dat dem fréieren Etablissement de radiodiffusion socioculturelle en neie Kader an, mat "Média de Service public 100,7" och en neien Numm ginn huet, ugewant gouf. D'Verwaltungsrotsmemberen an d'Presidence ginn elo net méi vun der Regierung erausgesicht. Nei Membere ginn, bis op déi dräi Staatsvertrieder, vum Verwaltungsrot selwer proposéiert. De Verwaltungsrot bestëmmt och selwer, wien d'Presidence iwwerhëlt.
D'Véronique Faber ass zanter Enn 2018 Member vum Verwaltungsrot vum 100,7 an zanter November 2019 Presidentin.