De Revirement vun der Kommissioun gouf mat grousser Freed bei de Kritiker vun TTIP a CETA opgeholl. D'Kommissioun hat allerdéngs hir Meenung geännert, ouni se wierklech ze änneren.
Et gëtt zwar elo eng "Procédure mixte" proposéiert, den Accord geet also duerch déi national Parlamenter. D'Kommissioun ass awer weiderhin iwwerzeegt dovun, datt esou een Handelsaccord legal gesinn ënnert hir Kompetenz fält. An net ënnert déi vun de Memberlänner.
"EU-only" momentan net populär
"EU-only" heescht dat am Bréisseler Jargon. D'EU eleng ass zoustänneg. D'Kommissioun an d'Europaparlament.
Um leschten EU-Sommet gouf Drock gemaach. Ënner anerem och vu Lëtzebuerg. De Premier Xavier Bettel huet sech niewent Aneren dofir agesat, datt op nationalem Niveau sollt ofgestëmmt ginn. Dat wär méi demokratesch, heescht et an der Argumentatioun.
De Label EU-only ass den Ament net gutt bei den EU-Bierger ze verkafen. Mol net zu Lëtzebuerg. An eng Ofstëmmung "just" am Europaparlament gëtt als manner demokratesch ugesinn.
Doriwwer kann ee streiden. An datt och Europaparlamentarier dat esou gesinn, ass vläicht ee Schoss, deen no hanne goe kann. Ëmmerhi riskéiere si domat, sech selwer als Zweet-Klass-Muppien a Saachen Demokratie dohin ze stellen.
Le provisioire qui dure?
Ob den Accord effektiv ka vun nationale Parlamenter gestoppt ginn, steet op engem anere Blat. D'Kommissioun huet do nämlech nach eng Brems an hir Propos agebaut: Soubal CETA am Europaparlament gestëmmt ass, soll den Accord provisoresch a Kraaft trieden. An zwar ier e vun allen 28 EU-Membre ratifizéiert ass.
Wéi provisoresch dat a-Kraaft-setzen ass, doriwwer ass d'Prozedur net kloer. Op d'Fro, wat géif geschéien, wa beispillsweis Wales mat "Nee" stëmmt, gouf et aus Kommissiounskreesser keng Äntwert. "Mir wëssen et net", sot eng Source. Kéint dee Provisorium also theoretesch éiweg weiderlafen, ouni datt den Accord jeemools géif definitiv a Kraaft trieden? D'Äntwert dorop war op alle Fall kee kloren Neen. "Mir huelen un, datt dat net geschitt", sou eng Source aus der Kommissioun. D'europäesch Bierger misste besser iwwert den Accord informéiert ginn, da géife si och net Nee soen.
Net wierklech méi Demokratie
D'Kommissioun ass op alle Fall vum Accord iwwerzeegt. An zwar esou, datt si aner Positiounen, trotz där elo proposéierter Procédure mixte, net envisagéiert. "CETA ass e gudden Accord. Ee progressiven Accord. Een Accord, dee mir sou séier wéi méiglech wëlle praktesch applizéiert gesinn," sou de Spriecher vun der Kommissoun Margaritis Schinas leschten Donneschdeg. No méi Demokratie héiert sech dat net un.
D'Kommissioun huet allerdéngs net Onrecht wa si seet, datt d'Majoritéit vun de Memberlänner deen Accord wollt. Datt der dono e puer op Distanz gaange sinn, ass net ganz éierlech. An eventuell Deel vum aktuelle Bréissel-Bashing ze verstoen.
D'Memberlänner kéinten d'Propos, den Accord provisoresch a Kraaft trieden ze loossen, refuséieren. Mol kucken, wat si decidéieren.
