Steierpolitik Avantagë fir Stock Options ginn (nach) net ofgeschaf

Déi blo-rout-gréng Koalitioun ass net bereet op d'Fuerderung vun der CSV anzegoen, an déi sougenannt Stock Options op den 1. Januar 2017 ofzeschafen. De Regime, mat deem Spëtzeverdénger hire Steiertaux reduzéiere kënnen, géif den Ament nach analyséiert ginn.

Pia Oppel

steieren suen.jpg

Fir Salairen, déi a Form vun enger Optioun op Aktien ausbezuelt ginn, gëlle steierlech Avantagen. De Regime kënnt an éischter Linn Spëtzeverdénger ze gutt. Dat wier "Unfug", sot den CSV-Deputéierte Gilles Roth géigeniwwer RTL. Dobäi sinn d'Stock Options 2002 ënnert der CSV agefouert ginn, an zwar iwwer eng Circulaire vun der Steierverwaltung.

D'Optioune ginn deemno zwar besteiert wéi een normale Revenu, also nom progressive Steierbarême, et gëtt dofir awer just 17,5 Prozent vun der Valeur vum Wäertpabeier consideréiert. Zënter 2012 ass de Regime iwwerdeems net méi op Participatiounen um eegene Betrib limitéiert a ka fir Optiounen op all Zorten Aktië benotzt ginn.

"Et gouf Abusen"

Den Ament wier net geplangt dorunner eppes ze änneren, seet d'DP-Deputéiert Joëlle Elvinger. De Finanzministère géif d'Steierpolitik awer "stänneg a Fro stellen": "A wann et do e Besoin gëtt ze legiferéieren, da wäerten se dat och sécher maachen."

Joëlle Elvinger (DP)

De Finanzministère confirméiert op Nofro hinn, datt den Ament keng Ännnerung um Regime vun de Stock Options geplangt ass. D'Steierverwaltung huet uganks des Joers all d'Entreprisen, déi hiert Personal mat "Stock Options" remuneréieren, opgefuerdert, fir detailléiert Informatiounen iwwer déi concernéiert Montanten ze liwweren. Mat brauchbare Resultater vun deem Monitoring rechent een am Finanzministère fir Ufank 2017.

Dorobber verweist och den LSAP-Deputéierte Franz Fayot. Et wier a sengen Aen awer kloer, datt et Abuse gouf. D'Zil wier vum Regime wier et gewiescht fir héich-qualifizéiert Aarbechtskräften aus dem Ausland mat Steieravantagen unzezéien. Wéi de radio 100,7 gemellt huet, ass dervun auszegoen, datt de Regime méi an anescht zum Asaz koum wéi uganks annoncéiert.

Käschtepunkt: 300 Milliounen Euro?

Ob d'Stock Options wierklech all Joer ee Steier-Ausfall vun 300 Milliounen Euro bedeiten, wéi de Gilles Roth dat bei RTL sot, misst een nach ofwaarden, esou de Franz Fayot. D'LSAP stéing steierlechen Extrawurschte fir Spëtzeverdénger prinzipiell kritesch géigeniwwer, mee éier ee sech zu de Stock Options positionéiert, wéilten d'Sozialisten elo ofwaarden, wat d'Zuele vun der Steierverwaltung weisen.

Franz Fayot (LSAP)

Déi gréng Fraktiounscheffin Viviane Loschetter wëll nach näischt zum Thema soen. Och si seet et misst een ofwaarden, wat d'Statistke vun der Steierverwaltung weisen.

Verfassungskonform?

De Gilles Roth huet am RTL-Interview och erwähnt, datt d'Stock Options just op enger Circulaire baséieren. Dat wier juristesch problematesch, well wahrscheinlech net konform zur Verfassung. De Franz Fayot vun der LSAP hält dat net fir ee grousse Problem, dat wier ee "juristesch-techneschen Aspekt".

Méi zum Thema

Braz, Gramegna, Bettel a Schneider gi Steierreform bekannt Dossier

D'blo-rout-gréng Regierung huet de 29. Februar eng Steierreform proposéiert.

Business Hands Put Coin
Steierreform

D'Steierverwaltung fuerdert méi Informatioune vun de Betriber iwwer d'Salairen, déi se a Form vun Optiounen op Aktien ausbezuelen. Déi Donnéeë sinn och fir d'Steierreform relevant.

Programm

  • Mat Groove a Séil

  • On air

    Notturno

  • Vu 6 bis 10

  • Vun 10 bis 2

  • Vun 10 bis 2

Net verpassen

  • De radio 100,7 sicht Redakteren/Animateuren

    radio 100,7

    De radio 100,7 sicht fir seng Magasinn-Redaktioun 1 Redakter/Animateur (m/w) 20 St/W (CDD 1 Joer)
    an 1 Redakter/Animateur (m/w) 40 St/W (CDI) fir direkt ze engagéieren.

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen