Black Midi - Schlagenheim Believe the hype!

Normalerweis wielt eis Museksredaktioun Disken als Album vun der Woch eraus, déi een zur Prime Time kann um Radio spillen. Den Album vun dëser Woch ass haart, onberechembar an net fir niewebäi ze lauschteren. Mee en ass sou relevant, datt mir eng Ausnahm maachen. Den Yves Stephany iwwer "Schlagenheim" vun der gefeierter Londoner Combo Black Midi.

Yves Stephany / cz

Black Midi - Schlagenheim

"Don't believe the hype" ass normalerweis eng gutt Fauschtreegel, wann et ëm nei Rockbands geet. Bei Black Midi hätt een d'Tendenz, si och mat Virsiicht ze approchéieren. Zanter iwwer engem Joer gëtt sou vill iwwer d'Band geschwat, bei hire Showcasë si laang Queue virun der Dier, an hire Maartwäert läit schonn iwwer deem véierfache vun deem vun de meeschten neien Indie-Bands. Dee Moment gouf et keng Infoen iwwer de Quartett, ausser datt si vu London kommen, keng Musek, ausser eng obskur a rar 7", déi fir puer Honnert Euro gehandelt gëtt, keng Biller, ausser e VHS-Video vun enger Session beim Radiosender NTS. An de leschte Méint hu Black Midi awer véier Singles erausbruecht an zanter e Freideg ass endlech den Debut-Album do - Deen heescht "Schlagenheim", an ass phänomenal gutt.

Musek ass schwéier ze beschreiwen

Wa mir eppes Neies héieren, vergläiche mir et ëmmer fir d'éischt mol mat Saachen, déi mir kennen, fir et iergendwéi kënnen anzeuerdnen an ze verstoen. De Gesank erënnert kloer un de "Les Claypool" vu Primus. Mat Momenter kléngt et och no Primus, wéi beim Titel "Bm Bm Bm", oder no Sonic Youth, wéi bei "Speedway", duerno dann no Devo, wéi am Titel "Talking Heads" ... Et ass XTC dran a Math Rock, Jazz a Metal. Mee opzezielen, no wat déi verschidden Deeler an Elementer kléngen, erkläert nach ëmmer net, wat et mat Black Midi op sech huet.

Kennegeléiert hunn déi véier sech op der renomméierter Londoner Brit School of Performing Arts and Technology. Do goufen eng Rëtsch Pop-Staren ausgebilt, dorënner d'Adele, Imigen Heep oder d'Amy Winehouse. Awer hir Musek ass definitiv wéineg Pop. Et ass experimentell, dynamesch an explosiv. An immens direkt. Et ass Musek, déi een net kal léisst, déi engem Héngerhaut gëtt. Datt Black Midi eng fantastesch Live-Band ass, konnt ech selwer schonn zweemol um eegene Leif erliewen. An den Album steet hirer Live-Intensitéit a kengster Weis no.

D'Ästhetik ass bis un d'Enn geduecht

Den Hype ronderëm d'Band huet sécher mat cleverem Marketing ze doen. Déi Jonge wësse genee, wat si maachen. Awer en ass och absolut justifiéiert. Mir hunn et hei mat enger vun deene spannendsten a wichtegste Gittarebands vum Moment ze doen. Et ass net just tumbe Rock, et sinn net just véier jonk Borschten, déi Kaméidi maachen. Et ass progressiven Art-Rock mat enger klorer Visioun an enger klorer Linn. Och dat huet Black Midi nees mat Devo gemeinsam. Och si poséieren an Uniformen, et gëtt bis an déi klengsten Detailer Wäert op dat visuellt geluecht, d'Ästhetik ass bis un d'Enn geduecht. An trotz de ville Referenzen ass Black Midi anescht wéi alles, wat een u Gittarebands kennt.

An der Mediathéik:

Album vun der Woch / / Yves Stephany
Lauschteren

Méi zum Thema

Bill Callahan
Bill Callahan - Shephard In A Sheepskin Vest

De Bill Callahan ass de Mann mat der onverkennbar dezenter Stëmm. Hien huet sech leschte Freide mat sengem Album "Shephard In A Sheepskin Vest" zeréckgemellt. Eisen Album vun der Woch.

Grateful Dead
Grateful Dead - Aoxomoxoa

De "Grateful Dead" hiren drëtten Album "Aoxomoxoa" feiert dëse Mount 50 Joer. Déi psychedelesch Gigante vu Palo Alto sprengen op dësem d'Konventioune vu Country a Rock. Eisen Déjà-Vu Album vun der Woch.

Programm

Net verpassen

  • Dëse Sonndeg um 11:00 LIVE aus der Congresshalle zu Saarbrécken

    DRP

    Eng Symphonie mat Piano - Esou gëtt dacks dem Johannes Brahms säin zweete Pianosconcerto beschriwwen. De russesche Pianist Nicolai Lugansky spillt dëst Wierk an där nächster Matinée vun der Deutschen Radio Philharmonie Saarbrücken Kaiserslautern, déi de radio 100,7 zesummen mat SR2 KulturRadio e Sonndeg, 15. Dezember 2019, vun 11.00 Auer u live aus der Congresshalle zu Saarbrécken iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen