International Classical Music Awards Den Ivan Boumans kritt de Composer Award

Iwwer de Weekend war de Jury vun den International Classical Music Awards (ICMA) op Invitatioun vun Unison, der kroatescher Museksvereenegung, zu Rijeka zesumme fir iwwer d'Resultater vum Vott fir déi beschte CD-Produktiounen 2019 an och d'Spezialpräisser ze diskutéieren. Op Virschlag vum radio 100,7 a vu pizzicato.lu kritt den Ivan Boumans de Composer Award 2020.

Guy Engels

Ivan Boumans
Foto: J.M. "Lupo" Ludowicy

"Den Ivan Boumans ass e ganz äifregen a villsäitege Komponist iwwer all Genren ewech. A senge bis dato ronn 150 Wierker - Kammermusek, Filmmusek, symphonesch Musek, Theaterproduktiounen, ... - beweist hien net nëmmen eng Fantasie ouni Enn, mee och eng grouss musikalesch Expressivitéit, déi hien als eng déif kënschtleresch Perséinlechkeet auszeechent." Esou begrënnt de Jury vun den ICMA säi Choix.

Beim Galaconcert fir d'Präisiwwerreechung, den 30. Abrëll zu Sevilla, wäert de Real Orquesta Sinfonica de Sevilla ënner der Leedung vum John Axelrod e Wierk vum Ivan Boumans opféieren.

Spezialpräisser

De Jury vun den ICMA vergëtt all Joer Spezialpräisser fir beispillhaft Karriären a virun allem u jonk Museker, déi nach am Ufank vun enger Karriär stinn, déi versprécht.

De Präis fir d'Liewenswierk geet dëst Joer un d'Pianistin Elisabeth Leonskaja, déi nach mat hirer rezenter Opnam vu Schubert-Sonaten bewisen huet, datt no esou vill Joren op der Bün Routine fir si e Friemwuert ass.

Zwee jonk Celliste kréien och e Spezialpräis: déi 20 järeg Erica Piccotti ass Young Artist of the Year, an de Philippe Schupelius kritt den Discovery Award.

16 CD-Produktiounen ausgezeechent

390 CD-Produktiounen waren dës Kéier fir den éischten Tour vun den International Classical Music Awards nominéiert. Am Laf vun deenen dräi Ofstëmmungsronnen huet de Jury - Fachleit aus Print -, Audio - a Webmedien aus 16 Länner - déi bescht Produktiounen aus 16 Kategorië gewielt. Dat geet vun der aler Musek iwwer Barock, Kammermusek, Oper, Symphonie bis bei zäitgenëssesch Musek an historesch Opnamen.

Ze ernimme sief - am Beethoven-Joer 2020 - déi nei Intégrale vun de Symphonië mam Danish Chamber Orchestra ënner der Direktioun vum Adam Fischer.

Label vum Joer 2020 ass Pentatone Classics, de Label, mat deem de Philharmoneschen Orchester Lëtzebuerg jo enk zesummeschafft.

D'Lëscht vun den ICMA-Gewënner 2020 fënnt een ënner www.icma-info.com

Méi zum Thema

Jukka-Pekka Saraste
An der Mediathéik

D'Baiba Skride interpretéiert dem Prokofjew säin zweete Geieconcerto zesumme mam OPL ënner der Direktioun vum Jukka-Pekka Saraste. Zweet Wierk um Programm ass dem Schostakowitsch seng aacht Sinfonie.

Dirk Altmann - CD Mozart.jpg
Klassik-CD vun der Woch

De Solo-Klarinettist vum SWR Sinfonieorchester Dirk Altmann iwwerzeegt mat senger Interpretatioun vum Wolfgang Amadeus Mozart sengem Klarinettequintett a sengem Klarinetteconcerto.

Net verpassen

  • 24.01. Opruff Media & Me

    Media and Me_2022_1200x667px.jpg

    De radio 100,7 mécht och dëst Joer mat beim Projet Media & Me an Dir kënnt Iech elo dofir umellen.

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • Buchkriticken

    D'Kulturredaktioun vum radio 100,7 presentéiert Rezensioune vu Lëtzebuerger an internationale Bicher.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen