The Good, the Bad and the Queen ​Wat fréier alles net besser war

De Brexit steet virun der Dier. The Good the Bad and the Queen hunn hir Impressiounen zum Thema d'lescht Joer op "Merrie Land" kënschtleresch zum Ausdrock bruecht. Den Damon Albarn, ex-Frontmann vu Blur a Kapp hanner Gorillaz, an de Paul Simenon, Punk-Rocker vun der éischter Stonn, erkläre firwat England haut op si wéi ee "Merrie Land" wierkt, en almoudescht Lala-Lulu-Land.

Marc Clement / cz

The Good, the Bad & the Queen am Atelier
Damon Albarn an de Paul Simenon (Foto: Deadly Sexy Carl)

"All déi räich Leit vun Eton (eng Eliteschoul and England), déi elo eist Land regéieren an hir Usiichten, hu mir probéiert op dëser Plack an abstrakt Ablécker ze verwandelen", seet den Damon Albarn. "Et ass eng Aart imaginéiert Géigewaart voll mat surrealisteschen Elementer."


Eist Gespréich mat The Good, the Bad and the Queen:

Lauschteren


D'Iddi vu wou een hierkënnt, wier e wichtegt Thema um Album. D'Englänner misste sech d'Fro stellen, ob si den europäeschen Optimismus deele wéilten, oder léiwer zum 53. Bundesstaat vun de Vereenegte Staate wéilte ginn. Dem Paul Simenon sinn als fréiere Bassist vun The Clash politesch Sujeten net friem. Hie gesäit den Album als eng Kritik un der Nostalgie. "Déi Iddi, datt d'Saache fréier besser waren. Mee dat ass just de rosa roude Brëll. (...) Ech si ganz houfreg op dës Plack, déi vill seet iwwer dat, wat mir sinn, vu wou mir hierkommen, a wat mir denken."

"De Referendum war eng ganz ongeschéckt Manéier fir mat der britescher Psyche ze kommunizéieren. A well et ongeschéckt war, ass et elo ee richteg groussen Duercherneen", seet den Albarn. D'Reaktiounen op den Album wiere besonnesch um Kontinent an an Irland immens positiv gewiescht. An England waren d'Echoe méi zeréckhalend: "Vläicht hale mir de Leit dofir dann awer ze vill e Spigel vir."

Op d'Fro, ob The Good, the Bad and the Queen geschwënn eng weider Plack wäerte maachen, seet dem Albarn säi Gesiichtsausdrock esou eppes wéi "Maach emol lues, Männi" ... An duerno, mat engem klenge Grinsen: "It's not career".

De Luxus, sech seng Projeten eraussichen ze kënnen, hunn d'Membere vum Supergrupp sech alleguer scho laang verdéngt. Gorillaz an Africa Express beschäftege meng zwee Gespréichspartner. Iwwerdeems gehéiert de Batteur Tony Allen als fréiere Member vum Fela Kuti senger Band zu deene Gefrotesten am Business, an de Gittarist Simon Tong spillt och bei The Magnetic Noth.

De 15. August waren The Good, the Bad & the Queen fir e Concert am Atelier. Den Damon Albarn kënnt iwwregens d'nächst Joer zeréck op Lëtzebuerg fir an der Philharmonie iwwer eng vu senge Liiblingsplazen ze sangen: Island. Rendez-vous de 29.5.2020, Froe stellen am Moment nach verbueden!

Méi zum Thema

The Good, the Bad & the Queen
The Good, The Bad & The Queen - Merrie Land

D'Supergroup ëm den Damon Albarn The Good, The Bad & The Queen huet en Album iwwer de Brexit erausbruecht. De Frontmann vergläicht d'Stëmmung a Groussbritannien mat engem schlechten LSD-Trip.

Programm

Net verpassen

  • Riicht eraus: Wéi eng Press(ehëllef) fir Lëtzebuerg?

    Riicht eraus

    Am Joer 2020 eng Zeitung erauszebréngen ass net einfach. Déi geschriwwe Press ass wéinst dem Internet an neie Gewunnechte vun de Lieser a Lieserinne mat enger Baisse vun de Verkafszuele a vum Ëmsaz konfrontéiert.

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen