"Eng offiziell Lëtzebuerger Release ass nach net geplangt", seet de Jean-Philippe Koch, Pianist an och de Komponist vum Trio Dock in Absolute, "mee dat wäert nach kommen".
Den 18. Mee 2019 ass och de Start vun enger grousser Tournée fir den Trio, dee vu Paräis, dann a Japan, iwwer Ungarn, Belsch, Frankräich, mee och nees am Summer an d'USA féiert. Am Hierscht soll den Jazztrio dann awer nees hir Tour weiderféieren, virun allem an den ëstleche Länner. "Eng indesch Tournée an och nach aner Datumen, déi ech net verroden dierf, sinn dru geplangt ze ginn", esou weider de Jean-Philippe Koch am Blue Note vum 20. Mee 2019.
Deen eenzege Lëtzebuerger Concert, dee bis ewell virgesinn ass, ass am Kader vun der Fête de la Musique de 14. Juni, op der Place Clairefontaine.
Den zweeten Album "Unlikely": méi däischter am Klang
Den éischten Album vun Dock in Absolute 2015 war direkt en Erfolleg, an d'Band konnt domat vill am Ausland optrieden. De Succès war esou grouss, datt se vu MusicLX 2017 als Export Artist of the Year, ausgezeechent gouf.
Zéng Titele goufen op deem zweeten Album vum Dock in Absolute agespillt, déi och schonn am Stil anescht kléngen, wéi um éischten Album.
"D'Musek huet sech e bëssen developpéiert, ass e bëssen anescht ginn. Wat genee? Dat sinn als éischt emol méi Effekter um Bass. Den David benotzt méi elektresch Effekter, et ass net méi esou akustesch. Ech bleiwen awer akustesch um Piano, dat hat ech scho vun Ufank u Wëlles. Och de Mich Mootz benotzt méi akustesch Effekter, metallesch kleng Accessoiren. Dat heescht, de Klang huet sech schonn e bësse geännert.", esou de Jean-Philippe Koch.
Am Interview verréit de Pianist weider, datt alles am Opus "Unlikely" e bësse méi däischter kléngt wéi um éischten Album, e bëssen wéi d'Bild um Cover vun der CD: an enger Aart alen düstere Schapp entdecke mir en delabréierte verloossene Piano.
Den Trio Dock in Absolute setzt sech zesumme aus dem Pianist Jean-Philippe Koch, dem David Kintziger aus der Belsch um Bass an dem Michel Mootz op der Batterie.
E véierte Museker gëtt et och nach: den Nate Wong, e Batteur aus Hong Kong, diploméiert um Berklee College of Music. Hie spréngt an op de Concerte fir de Michel Mootz, wann dee verhënnert ass.
De Jean-Philippe Koch war beim Manuel Ribiero am Studio fir den zweeten Album vun Dock in Absolute, virzestellen:
Weider Infoe fënnt een op www.dockinabsolute.com