Uber zu Lëtzebuerg Firwat ass d'Regierung retizent?

D'Transport-Netzwierk Entreprise Uber viru siwe Joer gegrënnt. Haut ass Uber an insgesamt 66 Länner an iwwer 500 Stied weltwäit disponibel. Mat engem einfache Klick mat Ärem Handy kënnt Dir esou op ville Plaze méi einfach, méi gënschteg a méi confortabel wéi an engem Taxi transportéiert ginn. A ville franséische Stied, dorënner Paräis, Lyon, Nice oder Stroossbuerg, ass dëse System gang und gäbe.

Zu Lëtzebuerg si Systemer wéi Uber illegal, well ee perséinleche Chauffer, deen eng Persoun manner wéi eng Stonn transportéiert, eng Taxislizenz brauch fir däerfen ze fueren. Frou iwwer dëse System ass virun allem d'Taxislobby, déi vum Mangel u Konkurrenz am Marché profitéiert. Wéi de Johannes Gutenberg am 15. Joerhonnert déi modern Drockpress erfonnt huet, hunn d'Entreprisen déi mat Sekretären Dokumenter op der Hand kopéiert hunn och probéiert den technologesche Fortschrëtt ze ënnerdrécken, well dës hier Monopolstellung a Gefor bruecht hätten. D'Taxisfederatioun wennt 600 Joer méi spéit nach ëmmer déi selwecht Taktik un: Zesumme mam Pouvoir politique séchert si sech déi néideg gesetzlech Virdeeler.

Deier Taxien zu Lëtzebuerg

Den Transportminister François Bausch sot dozou am Dezember d'lescht Joer ironesch, datt Uber op Lëtzebuerg kommen däerf, awer "just wa se d'Reegelen anhalen". Wuelwëssend, datt genau dës Reegelen de Problem jo geschaaft hunn. Fir dës Ausso gouf bei der Taxisfederatioun geklappt, déi weiderhin dofir suergt, datt Lëtzebuerg mat dat deierste Land ass fir een Taxi ze huelen, mat enger Moyenne vun 20 € fir fënnef Kilometer. Domat si mir am internationale Klassement als 100.000 Awunner-Stad viru München, Los Angeles, Mailand, Stockholm oder Genf, nëmmen Zürech an Oslo sinn nach virun eis.

De Minister Bausch huet elo viru kuerzem annoncéiert, datt hien ee "Covoiturage-System" wéilt lancéieren, deen ähnlech wéi Uber funktionéiere soll. Eng Alibi-Method fir ze versichen esou ze maachen, wéi wann de Problem geléist wier. Kloer ass dat hei: D'Taxien zu Lëtzebuerg sinn ze deier an d'Regierung ass déi eenzeg, déi de Marché opmaache ka fir dës Situatioun ze verbesseren.

Costume amplaz aarbechtslos

Ganz vill Chauffeuren, déi a Servicer wéi Uber schaffen ware virdrun aarbechtslos oder der Kriminalitéit ausgesat. An och wa si elo vill Stonne schaffe musse fir ee Mindestloun kënnen ze verdéngen: Et ass een Job, an deem si Costume a Krawatt undinn, an all Dag enger éierlecher Aarbecht no ginn. Mir sollten eisen Aarbechtsmarché op dës nei Servicer ausriichten, amplaz se trotzeg an d'Illegalitéit ze drécken.

Den Taxismarché fir d'Konkurrenz opmaache misst fir d'Regierung eng Evidenz sinn: Et hëlleft jonken Aarbechtslosen an deenen ouni Ausbildung aus hirer precairer Situatioun eraus ze kommen. Et reduzéiert d'Transportkäschten, wat domat och de Risiko verréngert, datt besonnesch Jonker, nodeem se gedronk hunn nach op den Auto zeréckgräifen. An et mécht d'Stad Lëtzebuerg méi attraktiv fir Geschäftsleit an Touristen.

Technologesche Fortschrëtt aus keng Gefor fir "de Lëtzebuerger Modell". Et ass eng wichteg Evolutioun an ee Wäert vu sozialer Gerechtegkeet.