E Samschdeg de Moien um 10 Auer ass d‘Trauerfeier op der Péitersplaz. Begruewe gëtt de gebiertegen Argentinier dann – wéi vun him gewollt – an der Santa Maria Maggiore Kierch.
Vill international Politiker:innen hu schonn annoncéiert, un der Bäisetzung deelzehuelen. Dorënner den US-President Donald Trump, den ukrainesche President Wolodymyr Selenskyj, d'EU-Kommissiounscheffin Ursula von der Leyen, den UN-Generalsekretär Antonio Guterres.
Och de Lëtzebuerger Premier Luc Frieden, de Grand-Duc Henri an d'Grande-Duchesse Maria Teresa wäerten also e Samschdeg un der Trauerfeier fir de verstuerwene Poopst François zu Roum deelhuelen. Dat hunn de Staatsministère an den Haff op Nofro hi confirméiert.
De Poopst François ass op Ouschterméindeg am Alter vun 88 Joer un engem Hiereschlag gestuerwen.
