De Baby Huey hat Succès an den 60er zu Chicago an ass ee vun den ënnerschätzte Soul Sänger ever. Seng Stëmm gëtt dacks mat där vum Otis Redding verglach. Hien huet just e puer Maxien erausbruecht, keen Album an huet integral vu sengen Tournéeë gelieft - viru sengem Doud war hien bal aacht Joer non-stopp mat senger genialer Band The Babysitters op Tour! Dat war eng extreem zesummegeschweesste Grupp, déi energeschen an psychedelesche Funk gespillt huet. Et kann ee si eventuell mam James Brown senge JB's vergläichen. Kuerz no sengem Doud koum dann 1971 säin éischten Album eraus: "The Baby Huey Story - The Living Legend", beim Curtis Mayfield sengem Curtom Records. De Baby Huey ass scho mat 26 gestuerwen, hie war iwwer 200 Kilo schwéier an zwee Meter grouss, war ëmmer extravagant gekleet an hat eng risen Afro-Coiffure. Seng Live Performance war eng vun deenen beléiftsten zu Chicago.
Den RZA huet d'Lidd am Joer 2000 benotzt fir dem Ghostface Killa fir säi "Buck 50 Featuring Method Man, Reman & Cappadonna" doraus ze maachen. Den Ironman aka Tony Starks liwwert e Klassiker vum Wu-Tang Clan. E war op sengem zweeten Album "Supreme Clientele" ze fannen, dee just viru senger Def Jam Period erauskoum.
Mee de Biz Markie hat et schonn fréier gesampelt an zwar op sengem Lidd "The Dragon" vun 1989. Hien ass ee vun deenen witzegste Rapper iwwerhaapt. Hie gouf fir d'éischt fir seng Beatbox Talenter an den 80er bekannt. No senger Renconter mat Marley Marl 85 huet hie säin éischten Album Enn 80er op Cold Chillin erausbruecht. Mee dëst Lidd staamt vu sengem zweeten Album "The Biz Never Sleeps". Do waren och nach aner Hits drop wéi "Just A Friend". Wéinst enger Plainte vun enger illegaler Sample Benotzung (!) gouf seng Karriär wärend sengem drëtten Album hefteg gebremst. Hien ass mëttlerweil just nach DJ a leidenschaftleche Plackesammler.
A Tribe Called Quest hunn de Sample och benotzt an zwar um Spirit Mix vun hirem Lidd "Can I Kick It". Dat war op hirem éischten Album, deemools waren den Q-Tip a Phive Dawg knapp 18 Joer al. Op der Album Versioun vun dësem Lidd sampele si "Walk On The Wild Side" vum Lou Reed, mee an der Video Versioun sampele si de Baby Huey. Am Video Clip gesäit een och, wéi si wuertwiertlech d'Wuert "It" kicken!
E lescht Beispill vun der Utilisatioun vum Sample sinn d'Alkaholiks um Lidd "Soda Pop". Dat kënnt vun hirem éischten Album "21 And Over" vun 1993. Déi zwee Rapper heeschen J-Ro an Tash an den Produzent King T. Et ass eng vun deenen interessantste West Coast Gruppen, déi Ufank 90er kee Gangsta Rap gemaach hunn.
