Staatsbudget 2018 Pierre Gramegna: Stock Options wéinst Brexit net ofschafen

De Pierre Gramegna ass dogéint, fir d'Instrument vun de Stock Options séier ofzeschafen: dat huet de Finanz- a Budgetsminister am Interview um radio 100,7 däitlech gemaach. Fir elo scho méi eng grouss Reform vun de Stock Options ze maachen, hätt een net genuch Donnéeën: déi sollen eréischt am éischte Semester 2018 do sinn.

Serge Kesseler / dw

Pierre Gramegna
Pierre Gramegna (DP)

D'Stock Options géifen d'Wirtschaft attraktiv maachen, fir Talenter op Lëtzebuerg ze kréien. Och am Kontext vum geplangte Brexit wier dëst Instrument néideg hei am Grand-Duché, esou de Minister. "Mir hunn elo an de leschten zwielef Méint d'Noriicht kritt, datt eng hallef Dosen Assurancë vu London sech zu Lëtzebuerg opstellen, datt Fund Manager heihinner kommen, datt sech och am Fintech-Beräich vill deet. Mir kënnen net dat begréissen, an dann esou een Instrument - wat et och zu London an op villen anere Plazen an Europa gëtt - einfach ofschafen."

Mam Instrument vun de Stock Options hunn Entreprisen d'Méiglechkeet, fir hir Mataarbechter zum Deel a Form vun Optiounen op Aktien ze bezuelen, wat steierlech Avantagë mat sech bréngt: Eng Mesure fir Spëtzeverdénger. D'Regierung plangt fir de Besteierungs-Taux vun elo 13 op 21 Prozent eropzesetzen, war beim Depot vum Projet fir de Staatsbudget 2018 annoncéiert ginn. De Minister hat am Juni hei op der Antenne gesot, datt mat de Stock Options Abuse geschitt wieren.

Erweiderung vun der Steierbonifikatioun fir Betriber

Déi geplangte Bonifikatioun fir Betriber, déi héich Investissementer fir Computer-Programme maachen, wier dem Minister no fir kléng, mëttel a grouss Entreprisë geduecht. De Pierre Gramegna huet confirméiert, datt och d'Bankeplaz "ganz bestëmmt" vum geplangte Changement bei der Bonification d'impôt wäert kënne profitéieren. De Minister schwätzt vun enger "Moderniséierung vun dëser Bonifikatioun, dat am Kontext vun der Digitaliséierung vun der Wirtschaft.

Emprunt vu bis zu enger Milliard Euro

D'Regierung freet d'Chamber fir 2018 bis zu eng Milliard Euro kënne léinen ze goen: et wier Traditioun, datt een eng Zomm vun Emprunt virgeséich, esou de Finanz- a Budgetsminister Pierre Gramegna um radio 100,7. D'Regierung plangt fir d'nächst Joer alles an allem 2,4 Milliarden Euro z'investéieren. Ob een déi eng Milliard muss léinen, géif ganz vun der Situatioun um Enn vun dësem Joer ofhänken. De Pierre Gramegna rechent elo schonn domat, datt den Defizit fir 2017 manner héich wäert ausfalen, wéi virgesinn.

Reaktioun op Oppositiouns-Kritik

Dës Regierung hätt 2013 eng Budgetssituatioun geierft, mat där Lëtzebuerg déi europäesch Reegelen net méi respektéiert hätt, huet de Pierre Gramegna am 100,7-Interview widderholl. "Mir waren um Wee fir riicht an d'Mauer", esou de Finanz- a Budgetsminister (DP). Wat elo op den Dësch geluecht gi wier, géif vun A bis Z komplett déi Bréisseler Critèrë respektéieren. Donieft hätt d'Regierung Reserven ugeluecht. E Budget 2018 ouni Defizit am Zentralstaat hätt 890 Milliounen Euro manner Investissementer bedeit.

D'CSV-Fraktioun hat nom Budgets-Depot kritiséiert, datt et 2018 trotz engem héije Wirtschafts-Wuesstem bei engem Defizit beim Zentralstaat bleift.

Budgetsprojet fir 2018

De Finanz- a Budgetsminister rechent fir 2018 mat ronn 890 Milliounen Euro méi Depensë wéi Recettë beim Zentralstaat. Beim Gesamtstaat - also den Zentralstaat zesumme mat de Gemengen an der Securité sociale - soll et d'nächst Joer een Iwwerschoss vun 333 Milliounen Euro oder 0,6 Prozent vun der Wirtschaftsleeschtung ginn. Esou ass et am Projet fir de Staatsbudget 2018 virgesinn: e Projet, deen de Pierre Gramegna e Mëttwoch an der Chamber deposéiert an explizéiert hat.

An der Mediathéik:

Invité:e vum Dag / / Serge Kesseler
Lauschteren

Méi zum Thema

The Wolf of Wall Street
Steierpolitik

Breede Konsens an der Chamber iwwert déi geplangte Reform vun de Stock options. Mat deem Steieravantage, vun deem bestëmmte Betriber a Salariéë profitéieren, verzicht de Staat op Millioune Recetten.

Euro-Mënzen.jpg
Steieren

D'Stock options misste reforméiert ginn, fuerderen och elo Vertrieder vun de Majoritéitsparteien. 150-180 Milliounen Euro Steiergelder goungen dem Staat d'lescht Joer wéinst de Stock options verluer.

Budget 2017 Dossier
Ëffentlech Finanzen

Artikele ronderëm de Staatsbudget fir 2017, deen den 12. Oktober deposéiert ginn ass.

Staatsbudget
Budget 2017

Trotz staarkem Wirtschaftswuesstem soll den Defizit vum Zentralstaat 2017 bei bal enger Milliard Euro leien. Staark Investissementer an d'Steiererliichterunge sollen de Budget justifiéieren.

Programm

Dossieren

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen