Zejoert gouf et manner Abréch zu Lëtzebuerg, mee méi Iwwerfäll mat Gewalt. Dat weisen d'Police-Statistike fir 2021. Déi nei Zuele goufen de Moien a Presenz vum Minister fir d'bannenzegt Sécherheet Henri Kox virgestallt.
Wat d'Abréch ugeet, huet och zejoert d'Pandemie bewierkt, datt d'Leit méi Doheem waren, an dofir manner agebrach gouf, sou d'Police.
Méi arméiert Iwwerfäll mat Gewalt
Déi arméiert Iwwerfäll, virun allem op Bensinnsstatiounen, sinn awer geklommen, där gouf et aacht Stéck zejoert. An et gouf däitlech méi Iwwerfäll mat Gewalt. Do goufe 505 Fäll notéiert - 85 méi wéi d'Joer virdrun.
Haaptsächlech an der Stad Lëtzebuerg wier et eng ganz Serie ginn, wou Ketten an Auere geklaut gi sinn. De Gros vun den Täter hätt d'Police identifizéiert an interpelléiert, sou den Direkter vun der administrativer Police, Pascal Peters.
Méi Plainte wéinst Menacen, Diffamation a Beleidegungen
De géigesäitege Respekt an der Bevëlkerung zu Lëtzebuerg hëlt of. Dat geet och aus de Police-Statistike fir 2021 ervir. D'Zuel vu Menacen, Diffamatiounen a Beleidegungen ee vis vis deem anere wier an de leschte fënnef Joer konstant geklommen, sou de Pascal Peters.
"Et gëtt vill méi oft Plainte gefouert an d'Leit ginn och vill méi oft Affer vun Diffamatioun, Calomnie an Injuren. Och iwwer Online an sou weider. Dat ass eng Tendenz déi ee gesäit, datt dat eropgeet."