Um rezente Kongress huet d'Partei sech eng nei Sektioun "ADR international" ginn huet, an där Leit aus anere Länner sech fir d'Partei engagéiere kënnen.
Fir de Fred Keup gëtt et och fir déi Leit ee klore Wee zur politescher Participatioun:
"Et muss der Rei no goen, [...] et kënnt een heihinner, et integréiert ee sech, et léiert een d'Sprooch. An da kritt een d'Nationalitéit a ka wiele goen."
D'ADR gesäit sech am Opdriff: ronn 200 Memberen hätt d'Partei zanter dem leschten Hierscht bäikritt, seet hiren neien Nationalpresident am 100,7-Interview.
De Fred Keup féiert dat haaptsächlech op d'Informatiouns-Campagne vun der ADR iwwer d'Verfassung an op hir kloer Linn an der Covid-Politik zeréck.
Den neien ADR-President kritiséiert d'Pläng, déi eventuell Indextranche vum August bis Abrëll 2023 auszesetzen.
Déi richteg Äntwert op déi ablécklech Kris wier villméi eng Reduktioun vun den Energiepräisser, un deenen hirem aktuell héijen Niveau d'Regierung mat Schold wier, sou de Fred Keu, deen zanter Mëtt Mäerz den Nofollger vum Jean Schoos als ADR-Parteipresident ass.
Flüchtlingen aus der Ukrain: Eng aner Situatioun wéi bei Flüchtlingen aus Afghanistan
Beim Accueil vu Flüchtlingen aus der Ukrain gesäit den neien ADR-President d'EU an enger anerer Verantwortung, wéi beispillsweis bei Krichsflüchtlingen aus Syrien oder Afghanistan:
"De Punkt ass deen: d'Ukrain grenzt un d'Europäesch Unioun. An dat ass natierlech eng ganz aner Situatioun, wéi wann elo Leit aus engem Land kommen, dat vill méi wäit ewech ass. Wou se fir d'éischt mussen duerch eng ganz Partie Länner komme fir an d'Europäesch Unioun ze kommen.[...] Een, deen aus dem Afghanistan [flücht], dee muss net bis an Europa komme fir an e séchert Land ze kommen. Do ginn et aner Méiglechkeeten."
Refugiéen aus der Ukrain kéinte just an Europa flüchten, well op den anere Säite Russland oder Belarus léichen, preziséiert de Fred Keup.