OGBL-Presidentin Nora Back No gescheiterter Tripartite: Den OGBL wëll "op d'Strooss goen"
Mir froen d'Presidentin vum OGBL, ob si sech an den Tripartite-Verhandlunge verpokert huet. D'Nora Back stellt gewerkschaftlech Aktiounen an Aussiicht, bis "déi Index-Manipulatioun" vum Dësch wier.
Den OGBL wëll géint de Mesurëpak op d'Strooss goen, deen d'Regierung no den Tripartite-Verhandlungen decidéiert huet. D'OGBL-Presidentin Nora Back seet, datt am Moment "gewerkschaftlech Aktiounen" a "Manifestatiounen" géint de Mesurëpak geplangt géife ginn:
"Mir sinn elo an der Diskussioun ronderëm eng Informatiounscampagne. An da geet et an d'gewerkschaftlech Aktiounen iwwer. Ech kann Iech haut net soen, wat wéini wäert gemaach ginn. Dat géif ech och net elo op der Antenn soen."
D'OGBL-Presidentin betount, si géif sech keng Suergen driwwer maachen, datt et dem OGBL u Réckhalt feelt: "Mir wäerte beweisen, datt vill Leit hannert eis stinn".
D'Nora Back seet weider, datt sech den OGBL an deenen nächste Wochen, Méint a Jore géif wieren, "bis déi Index-Manipulatioun vum Dësch" wier. Dëst géif an där Form geschéien, datt den onofhängege Gewerkschaftsbond "op der Strooss" gewerkschaftlech Aktiounen a Manifestatioune géif organiséieren.
An der Mediathéik:
LauschterenMéi zum Thema
"Solidaritéitspak" vun 830 Milliounen Euro
Et ass dat iewescht Zil den Index-System als Garant fir de soziale Fridden ze erhalen: Dat huet de Premier Xavier Bettel de Mëtteg an der Chamber gesot, an der Regierungs-Deklaratioun iwwer d'Resultater vun der Tripartite.
Tripartite-Accord ouni den OGBL ënnerschriwwen
D'Regierung, d'UEL, den LCGB an d'CGFP hunn en Tripartite-Accord ënnerschriwwen - ouni den OGBL. Erklärunge, wat dat heescht a wéi et dozou komm.
