Tripartite Gilles Baum: OGBL soll bei weideren Diskussioune mat um Dësch sëtzen

De Resumé vum Interview lauschteren

D'Gesetz wäert sech deemno drop limitéieren ze soen, wéi Leit mat klengen a mëttlere Paien déi Tranche wärend néng Méint kompenséiert kréien, bis se da vum 1. Abrëll dat anert Joer un och effektiv ausbezuelt gëtt.

Alles, wat duerno geschitt, gëtt zu engem spéideren Zäitpunkt gereegelt. Déi aner Elementer vum Accord ginn an enger nächster Etapp gekläert - sou ass et de leschte Freideg decidéiert ginn: d'Regierung hat en Amendement an deem Sënn abruecht.

D'Initiativ fir op dee Wee ze goe wier awer kloer aus der Chamber komm, sou de Gilles Baum.

Gilles Baum hält um Tripartitesaccord fest

Vum Accord wier awer näischt a Fro gestallt, betount de Gilles Baum, President vun der parlamentarescher Spezialkommissioun Tripartite:

"En Accord ass en Accord. Den Accord, deen ënnerschriwwe ginn ass, dee gëllt bis den 31. Dezember d'nächst Joer. Dat, wat do dra steet, ass net a Fro gestallt, absolut net."

De Gilles Baum ka ech awer virstellen, datt d'Tripartite nach eng Kéier géif zesumme komme "fir vläicht e Solidaritéitspak 2 ze schnüren".

Hei misst virun allem diskutéiert ginn, wéi eng eventuell nächst Indextranche kompenséiert gëtt, wann och déi ëm e puer Méint muss verréckelt gëtt.

Sozialpartner sollen all zesummen diskutéieren

Dofir missten déi véier Vertragspartner da fir Verhandlungen zesummekommen, seet de Michel Reckinger, President vum Patronatsverband UEL. Hie schwätzt ausdrécklech vun de véier Vertragspartner, also Regierung, UEL, LCGB a CGFP:

"Mir sinn hei am Kader vun engem Kontrakt, dee mer ënnerschriwwen hunn zesummen, an net am Kader vun enger neier Tripartite."

A well den OGBL net ënnerschriwwen huet, hätt en och bei de Gespréicher iwwer nächst Kompensatiounen näischt verluer, mengt de Michel Reckinger.

"Falsch!", seet dozou de Gilles Baum. Den Tripartitesaccord géif prezis soen, wat am Fall vun enger zousätzlecher Indextranche ze geschéien huet: op der leschter Säit vum Dokument wier festgehalen, datt d'Sozialpartner nach eng Kéier zesumme géife kommen.

"An do steet net, datt nëmmen déi dierfen zesummekommen, déi den Accord gedroen hunn. Ech muss Iech soen, datt ech et net gutt géif fannen, wann déi gréisst representativ Gewerkschaft ausgeschloss géif ginn."

De Solidaritéitspak gëtt de Staat keng bëlleg. A wann eng weider Indextranche sollt erfalen, déi och nees verréckelt a kompenséiert gëtt, komme weider onerwaart Depensen op de Budget zou.

Et steet deemno och net onendlech vill Geld fir Kompensatiounen zur Verfügung. "Mir mussen hei am Land léieren, eis der Decken no ze strecken", sou de Gilles Baum.