Sozialhëllef D'Office-socialle warne virun Enkpäss
D'Präisser klammen an dowéinst rechnen d'Office-sociallen an de nächste Méint mat méi Ufroen. Et kéint och zu personellen Enkpäss kommen, wa bannent kuerzer Zäit vill Demandë bäikommen: D'Office-socialle wieren nämlech elo scho relativ ausgelaascht, esou d'Verbandspresidentin.
Am Moment wier d'Demande no sozialen Hëllefen nach net dramatesch an d'Luucht gaangen, esou d'Presidentin vum Verband vun de Sozialämter de Moien am Interview. An awer sinn d'Office-socialle relativ ausgelaascht, well d'Personal vill Aarbecht huet.
Zum Beispill sinn d'Entretienen zäitopwänneg well een net just Lëschten ofhaakt, mee dës Gespréicher e puer Stonnen dauere kënnen:
"A wann do vill nei Demandë kommen, a mir dat wëllen en toute âme et conscience maachen, esou wéi dat an den Office-sociallen gemaach gëtt - da komme mer an d'Bredouille mam Personal."
Vue datt d'Präisser weider klammen, géifen d'Office socialen an de nächste Méint dowéinst mat méi Ufroen a personellen Enkpäss rechnen, seet d'Ginette Jones. Hei géif ee probéieren, fir sech intern ze preparéieren, mee dëst wier schwiereg well et deels u qualifizéiertem Personal um Aarbechtsmaart feelt.
Ee weider Punkt betrëfft d'Ausbaue vun Hëllefen, déi de Leit séier an onbürokratesch bei Fraisen ënner d'Äerm gräife kënnen:
"[...] datt mer eben och mat den Decideuren a mat de politeschen Acteure kucken op et net och Hëllefe gëtt, déi net iwwer den Office social lafen, wou d'Leit kënnen direkt gehollef kréien, an da net mussen op den Office social kommen [...]"
An der Mediathéik:
LauschterenMéi zum Thema
Epicerie Socialen: 30 Prozent méi Undrang bannent de leschte 5 Joer
D'Zuel u Stéit, déi sech an den Epicerie Socialë vun der Cartias versuergen, ass bannent de leschte 5 Joer em méi wéi 30 Prozent geklommen, sou déi politesch Porte-Parole vun der kathoulescher ONG.
Marie-Josée Jacobs: Geldspenden am Moment am sënnvollsten
D'Presidentin vu Caritas Lëtzebuerg huet ënnerstrach, datt Donen déi Hëllef wieren, déi am Moment am meeschte Sënn géif maachen. D'Spendebereetschaft wier esou grouss wéi nach ni.
