Energietransitioun Grousst Potential vu Sonnenenergie zu Lëtzebuerg

Am Gespréich mam Maurice Molitor erkläert de President vun der Associatioun Eurosolar, de Paul Zens, wéi grouss d'Potential vu Sonnenenergie zu Lëtzebuerg ass. Hie seet och, datt d'Gemengen an dësem Beräich eng grouss Roll spille well si den Ausbau vu Solarenergie fërderen oder bremse kënnen.

Maurice Molitor / sam

Paul Zens
De Paul Zens ass President vun der Associatioun Eurosolar.

Eurosolar ass eng Associatioun, déi sech sech zanter 20 Joer fir d'Energietransitioun hei am Land asetzt, also fir den Iwwergang vun den ëmweltschiedleche fossilen Energie wéi Gas a Petrol op klimafrëndlech Energien aus Sonn a Wand.

Grousst Potential vu Sonnenenergie zu Lëtzebuerg

D'Associatioun huet virgerechent, wéi grouss d'Potential vun der Sonnenenergie ass, wann een iwwerall do, wou de Buedem souwisou scho versigelt ass, Solarzellen installéiere kéint. Dat huet de President vun Eurosolar, de Paul Zens, am Interview erkläert:

"Mir hunn hei zu Lëtzebuerg ronn 250 km2 bebaute Fläch. Wann een dat ëmrechent: Grosso modo kann ee pro 30 km2 ronn 5.000 Gigawatt-Stonnen hirstellen. Dat heescht wa mir dann d'Hallschecht huelen, da si mir schonn op 20.000 GwH. An dann ass dat nach nëmmen déi Fläch, déi scho versigelt ass, wou schonn Haiser stinn."

20.000 Gigawatt-Stonne wier méi wéi d'Hallschent vum aktuellen Energiebedarf pro Joer hei am Land, wann een d'Schwéierindustrien ausklamert, esou de Paul Zens. Dee Moment zitt Eurosolar dëse Fazit: Mir kënnen et hikréien, eise ganzen Energiebedarf mat Erneierbaren ze decken - wann et eis geléngt, manner Energie ze verbrauchen.

Gemengen hu wichteg Roll

De Paul Zens huet awer och d'Roll vun de Gemengen ugeschwat a gesot, datt si ganz vill kéinte maachen, fir den Ausbau vun der Solarenergie virun ze dreiwen. Hei wier et speziell wichteg fir d'Photovoltaik als Element vun der Energietransitioun ze erméiglechen an ze implementéieren.

Dacks géife si hir Reglementer awer benotzen, fir den Ausbau éischter ze bremse wéi ze fërderen, wat hie bedauert:

"Dat huet da mat Denkmalschutz oder protégéiert-Secteur-Grënn ze dinn. Dat huet och heiansdo mat Saachen ze dinn, déi mir net richteg kënnen novollzéien. Dat gëllt z.B. och fir Wärmepompelen, déi soi-disant vill Kaméidi maachen oder net schéi wieren. An dat si Saachen, déi musse mir iergendwéi aus der Legislatioun erauskréien."

An der Mediathéik:

Invité:e vum Dag / / Maurice Molitor
Lauschteren

Méi zum Thema

Gaston Trauffler
Industriellefederatioun

Wa Russland de Gaskrunn zoudréint, kéint een net vun der Industrie erwaarden, dat eleng opzefänken, seet de Gaston Trauffler. Et wier e kollektiven, nationalen Effort néideg fir an der Energiekris ze bestoen.

Net verpassen

  • Offre d'emploi: Redakter/Redactrice Web

    radio 100,7

    Den Média de service public 100,7, deen de radio 100,7 bedreift, sicht en/eng neie/nei Redakter/Redactrice fir d'Onlineredaktioun mat engem Aarbechtskontrakt op onbestëmmten Dauer (CDI) fir 40 Stonnen d'Woch.

Programm

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen