Et hätt ee schonn zougestane kritt, datt nach eng Persoun vun der société civile géif bäikommen, mee d'Kriticke géife sech doduerch net änneren, sou de Gilbert Pregno. Och de Kannerrechts-Comité vun de Vereenten Natioune wier ganz kritesch vis-à-vis vun där Kommissioun.
"Esou wéi dat doten elo do opgestallt ass, geet et net. Ech ginn net dovun aus, datt dat geännert gëtt. Well de Feelermanagement an der Politik ass eng Katastroph."
De President vun der konsultativer Mënscherechtskommissioun gleeft awer net méi drun, datt sech um Text nach eppes wäert änneren.
Paradigmewiessel no laangwierege Verhandlungen
D'Regierung géif awer mat Recht behaapten, datt déi nei Gesetzer iwwer Jugendschutz a Jugendstrofrecht, déi se am Abrëll an der Chamber deposéiert huet, e Paradigme-Wiessel duerstellen. Datt d'Legislatioun an deene Beräicher no vill Hin an Hier elo endlech an Aklang mat der Kannerrechts-Konventioun bruecht gëtt, féiert de Gilbert Pregno op den Afloss vun der fréierer Presidentin vum UNO-Kannerrechts-Comité zréck. D'Renate Winter hat d'Regierung beim Ausschaffe vu béiden Texter begleet.
"Et deet mer e bësse leed, dass mir dat net hikritt hunn. Mee mir waren iergend eng Kéier och an Diskussioune verfaangen, wou et net virugaang ass. An ech begréissen da wierklech elo, dass et esou wäit kënnt. Ech muss soen, et ass en Asaz vu mir iwwer laang Zäit: Ech hat net méi geduecht, datt ech et géif erliewen. Ech sinn immens frou, awer och e Stéck rosen a verbattert, datt déi Chance net virdru geholl ginn ass fir dat ze verbesseren."