De maximale Cotisatiounsniveau läit aktuell bei 3,05 Prozent vu fënnef mol de Mindestloun, och wann ee méi wéi dat verdéngt. D'Lynn Settinger vum OGBL kéint sech virstellen, datt een op siwe mol de Mindestloun eropgeet, oder d'Deckelung souguer ganz kéint ophiewen.
"Da kéint ee bis zu 258 Milliounen Euro op ee Coup erakréien", esou d'Analys vum OGBL. Dat kéint deemno wéi dozou féieren, datt Leit, déi manner wéi fënnef mol de Mindestloun verdéngen, vläicht guer net méi misste cotiséieren.
CNS soll méi en charge huelen
D'Lynn Settinger vum Onofhängege Gewerkschaftsbond mengt, d'Gesondheetskeess misst an Zukunft zousätzlech Leeschtungen en charge huelen, an nennt als Beispill d'Zännmedezin:
"Mir wëssen alleguer, dass wa mer bei den Zänndokter ginn, dass mer awer zimmlech déif an eis Täsch musse gräifen. An hei geet et dann awer drëms, fir de Leit e bësse méi entgéint ze kommen."
D'Gesondheetskeess wäert dëst Joer mat engem änlechen Defizit ofschléisse wéi dat lescht: ronn 55 Milliounen Euro. Et muss also nees eemol an d'Reserv gegraff gi, fir d'Konten auszegläichen.
Mee well déi Reserv net onendlech ass muss gläichzäiteg driwwer nogeduecht ginn, wéi ee Recetten an Depense kuerz- oder spéitstens mëttelfristeg nees an en Equiliber kritt.