No der COP27 Joëlle Welfring zitt e gemëschte Bilan aus der Weltklimakonferenz

D'Ëmweltministesch Joëlle Welfring schwätzt vun enger "staarker Symbolik" am Zesummenhang mam Kompensatiounsfong, deem säi Prinzip zu Scharm El-Scheich acceptéiert ginn ass. Déi vulnerabelst Länner, déi am meeschten ënner de Konsequenze vum Klimawandel leiden, hätten 30 Joer dorop gewaart, sou d'Joëlle Welfring am 100,7-Interview.

Joëlle Welfring / cbi

Joëlle Welfring
D'Joëlle Welfring war als Lëtzebuerger Ëmweltministesch op der Weltklimakonferenz zu Scharm El-Scheich

Mat de Suen aus dem Kompensatiounsfong sollen déi Länner, déi am meeschten ënner de Konsequenze vum Klimawandel leiden, entschiedegt gi fir de Schued no Naturkatastrophen, déi op verännert klimatesch Bedéngungen zeréckzeféiere sinn. Déi konkret Modalitéite mussen awer nach gekläert ginn.

Ëmweltministesch zitt ee gemëschte Bilan

D'Joëlle Welfring ënnersträicht déi "ganz staark Symbolik" vun deem Fong: dat wier eng Fuerderung, déi d'Entwécklungslänner schonn zanter 30 Joer hätten.

"Et war also schonn eppes ganz Wichteges, fir déi do Saach ze deblockéieren"; esou d'Ëmweltministesch. Si wier "wierklech gudder Hoffnung", datt een op deem Punkt kéint weiderkomme fir ze weisen, "datt et eis eescht ass".

D'Joëlle Welfring begréisst dëse prinzipiellen Accord fir de Kompensatiounsfong, d'Ëmweltministesch bedauert awer, datt d'Zil fir d'Äerderwiermung op 1,5 Grad ze reduzéieren ee Moment op der COP27 a Fro gestallt gouf.

Et wier "batter", datt op der Weltklimakonferenz keng konkret Fortschrëtter a Saache Reduktioun vun CO2-Emissiounen an dem Erausklammen aus de fossillen Energië gemaach konnte ginn, esou déi gréng Ministesch am 100,7-Interview:

"Do sinn aner finanziell kuerzfristeg Interessen, déi där Saach do leider am Wee stinn, déi hunn do absolut dominéiert. Déi hunn zum Deel och, menger Meenung no, d'Presidence beaflosst, wéi mer gemierkt hunn an deene Verhandlunge vun deenen ambitionéierte Länner - an dat war net just Europa - mir konnten do eng gewëss Energie entwéckele mat anere Länner wéi Kanada, souguer d'USA (déi och zu deene méi ambitionéierte gehéiert hunn). Mee trotz där Front war den Afloss vun anere Kräfte méi staark."

COP27: Aktivist:inne "motivéieren zousätzlech"

Egal wéi schwéierfälleg a schwiereg d'Diskussiounen op den UNO-Klimakonferenze sinn: d'Ëmweltministesch fënnt de perséinleche Kontakt an den Austausch, deen do méiglech gëtt, fir wichteg.

D'Format vun esou enger grousser internationaler Konferenz eemol a Joer wëllt d'Joëlle Welfring net a Fro stellen: d'COP wier wichteg fir den Austausch ënnereneen an e bessert Verständnis vuneneen.

D'Ëmweltministesch betount och déi wichteg Roll vun der Zivilgesellschaft op dëse Konferenzen. Et wier wichteg, datt Aktivist:innen do sinn an datt d'Jugend sech manifestéiert an hir Messagë widderhëlt. "Dat motivéiert natierlech zousätzlech, sech anzesetzen", esou d'Joëlle Welfring.

An der Mediathéik:

Invité:e vum Dag / / Maurice Molitor
Lauschteren

Méi zum Thema

COP27
Weltklimakonferenz

No laangen Negociatiounen op der Weltklimakonferenz gouf zu Scharm El-Scheisch de Sonndeg Moien en historeschen Accord fonnt. Fir d'éischte Kéier si sech bal 200 Länner eens fir en Entschiedegungsfong fir Entwécklungslänner ze schafen.

Joëlle Welfring
Joëlle Welfring op der COP27

D'Weltklimakonferenz zu sollt u sech haut um Freideg den Owend op en Enn kommen. Mee d'Negociatiounen gi weider, fir datt bal 200 Länner e Wee fannen, fir d'Versprieche vum Paräisser Klimaofkommes anzehalen.

Semion Smolenskiy
Weltklimakonferenz

Nieft de groussen nationalen Delegatiounen sinn och vill aner Leit op der COP27 ënnerwee. Ënner hinnen ass och de Semion Smolenskiy, Premièresschüler aus dem Ettelbrécker Lycée. Mir hunn eis mat him ënnerhalen.

Net verpassen

Programm

Dossieren

  • Alles iwwer de Podcast Schlechte Schüler

    An eisem Dossier fannt dir sämtlech Episode vun eisem Podcast Schlechte Schüler, Interviewe mat Schoulexperten an déi komplett Transkripter vun den eenzelnen Episoden.

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen