No LSAP-Kritik Carole Thoma: Rose wa lénk Parteie keng lénks Politik maachen
Et wier net eng bewosst Strategie vun déi Lénk, d'LSAP méi schaarf z'attackéiere wéi déi zwou aner Majoritéitsparteien, sou d'Co-Parteispriecherin Carole Thoma vun déi Lénk.
D'Carole Thoma streit awer net of, datt an hirer Ried um Neijoersch-Patt vun der Partei méi spatz Kriticken un de Sozialiste wéi un DP an déi gréng ze héiere waren.
Zum Beispill de Saz: "Mat esou enger bëlleger Sozialdemokratie, wien brauch do nach eng DP?"
Dat wier eng Äntwert op der Paulette Lenert hir Aussoe gewiescht, datt si keng fäerdeg Meenung méi zum Index hätt a si sech enger Diskussioun iwwer eng Deckelung vum Index net géif verschléissen.
Et géif si rose maachen, wa Parteien aus dem lénke Spektrum kengt lénks Politik géife maachen, sou d'Carole Thoma. De "politesche Feind" ass fir déi Lénk awer éischter um "rietse Spektrum" ze fannen.
Rotatiounsprinzip bleift erhalen
Bei de Gemengewalen am Juni wäerten déi Lénk emol sécher an der Stad, zu Esch, zu Déifferdeng, Diddeleng, Suessem a fir d'éischt och zu Péiteng untrieden, sou d'Co-Spriecherin vun der Partei Carole Thoma.
Bei de Chamberwalen am Hierscht da wäerten déi zwee Ex-Deputéiert Marc a Baum an David Wagner nees eemol matgoen, déi an der Halschecht vun der Legislaturperiod vun der Myriam Cecchetti an Nathalie Oberweis ofgeléist goufen. Un deem Rotatiounsprinzip wäerten déi Lénk och an Zukunft weider festhalen, sou d'Carole Thoma. Déi Lénk géife sech keen Zil a Prozenter oder Sëtz fir déi national Wale setzen, se wéilten natierlech awer gestäerkt ginn. Ma net op Käschte vun anere Lénksparteien.
An der Mediathéik:
LauschterenMéi zum Thema
Déi Lénk kritiséieren d'Loyersgesetz
Déi sozial Ongerechtegkeeten an d'Klimakris waren d'Haaptsujete gëschter Owend um Neijooschpatt vun déi Lénk. D'Oppositiounspartei reprochéiert der Regierung "politique politicienne" a Walkampf um Réck vun de Leit ze maachen.
ILRES-Direkter: Eng weider Dräierkoalitioun no de Walen
Lëtzebuerg wäert och no den nächste Walen nees vun enger Dräierkoalitioun regéiert ginn, dat steet fir den Tommy Klein vun der ILRES fest. Oppe wier just d'Fro, wéi eng dräi Parteien dat kéinte sinn.
