Chamberwalen CSV-Presidentin schléisst Luc Frieden als Spëtzekandidat net aus
D'CSV wëllt bis spéitstens Enn Mäerz decidéieren, wien d'Partei an d'Wale féiert. D'Decisioun, ob et een nationale Spëtzekandidat gëtt oder e puer regional Spëtzekandidaten, wier nach net gefall. Op Nofro hin huet d'Parteipresidentin Elisabeth Margue net ausgeschloss, datt de fréie Finanzminister Luc Frieden CSV-Spëtzekandidat kéint ginn.
D'CSV-Parteipresidentin Elisabeth Margue sot de Moien op der Antenn, datt de Moment e puer Optioune fir d'Spëtzekandidatur an den zoustännege Parteigremien diskutéiert ginn. Dëst wier also déi éischt Etapp, déi géif ustoen:
"Mir hunn do eng ganz kloer Prozedur an eise Statute virgesinn, déi fir d'éischt emol virgesäit, datt den Nationalcomité decidéiert, wéi mir eis opstellen. Dat heescht: Ee Spëtzekandidat um nationalen Niveau, e puer Bezierks-Spëtzekandidaten, oder zwee oder dräi."
No dësem éischte Schrëtt sollen da Sondéierungsgespréicher mat méigleche Kandidate gefouert ginn. D'Elisabeth Margue wollt sech de Moien net dozou äusseren, wien dofir a Fro kéim.
Op Nofro hin huet d'Parteipresidentin awer net ausgeschloss, datt de fréien Finanzminister Luc Frieden d'Spëtzekandidatur bei der CSV kéint iwwerhuelen:
"Nee, ech schléissen näischt aus. Mir sinn an enger Situatioun, wou mir an enger Kris sinn: Als Land, an och als Partei, kënne mir an där hei Situatioun ganz oppe mat der do Fro ëmgoen. An déi néideg Froe stellen, déi mir mussen."
An der Mediathéik:
LauschterenMéi zum Thema
D'CSV wëllt de Wiessel
D'CSV huet sech op hirer Neijooschtreception kämpferesch gewisen. Déi aktuell Koalitioun wier um Enn an dofir stéing ee prett fir de Wiessel. Konkret Kritik gouf et un der Gesondheets- der Steier- an der Logementspolitik.
Spëtzekandidat: D'CSV hëllt eréischt d'nächst Joer eng Decisioun
D'CSV wëllt eréischt d'nächst Joer annoncéieren, wien d'Spëtzekandidatur bei de Chamberwalen iwwerhëlt, seet d'Elisabeth Margue. Si soll muer um CSV-Kongress als nei Parteipresidentin gewielt ginn.
