Seng Ambitioun wier et, säint dozou bäizedroen, datt d'CSV stäerkst Partei bleift an nees an d'Regierung kënnt.
"Et ass awer evident, datt wann d'CSV sollt an der Oppositioun bleiwen (wat ech net hoffen, an ech kämpfe fir de Contraire) ... da ginn ech an d'Chamber, da bleiwen ech do och fënnef Joer. Dat schéngt mer awer an dëser Situatioun als Spëtzekandidat nëmmen normal."
D'CSV misst et fäerdeg bréngen dat Wirtschaftlecht an dat Soziaalt mateneen ze kombinéieren, sou wéi se dat an der Vergaangenheet och op "eng eenzegaarteg Aart a Weis" gemaach hätt, sou de Luc Frieden.
"E staarke Sozialstaat wëlle mer, mee fir e staarke Sozialstaat ze hunn brauch een eng Ekonomie, déi gutt funktionéiert, mat engem Wuesstem, deen nohalteg an inklusiv ass. An dorop wäert ech schaffen. E Samschdeg fänke mer un, dee Walprogramm ze schreiwen."
Als designéierte Spëtzekandidat hätt hien och wëlles "e grousst Wuert" bei deem Walprogramm matzeschwätzen an en dann "als Ekipp no vir ze bréngen".
Keng méiglech Koalitioune mat "Extreemer vu riets a lénks"
Dee Walprogramm soll dem Luc Frieden no ee Parteiprogramm "aus der Mëtt" ginn. Hie schléisst dofir och Koalitioune mat "Extreemer vu riets a lénks" aus.
"Ech mengen, datt dat net gutt ass fir d'Land, datt mer do net weider kéimen, an do géife mer och eise Programm net genuch ëmgesat kréien."
Wiseler a Margue hunn den Numm Luc Frieden an d'Gespréich bruecht
De Luc Frieden huet am Interview och verroden, wéi et dozou koum, dass hie Spëtzekandidat vun der CSV ginn ass: Kuerz viru Chrëschtdag hätt de Presidenten-Tandem Elisabeth Margue a Claude Wiseler hie gefrot, ob si säin Numm intern dierften an d'Gespréich bréngen. Hien hätt sech Bedenkzäit gefrot, fir an der Chrëschtvakanz kënnen driwwer nozedenken.