Weltklimarot All Eenzele ka säin Deel dozou bäidroe fir de Klimawandel ze bremsen
Eng vun den Haaptconclusioune vum drëtten Deel vum Rapport vum Weltklimarot: Et wier wuel nach Zäit de Klimawandel ze bremsen, mee heifir missten déi néideg Mesuren - ewéi zum Beispill e Wiessel vu fossille Brennstoffer op erneierbar Energien - séier ëmgesat ginn, seet den Andrew Ferrone. De Lëtzebuerger Vertrieder am internationale Klimarot IPCC mengt, datt de politesche Wëllen heifir do wier. An och déi technesch Mëttele wiere schonn disponibel.
Net nëmme Politik a Gesellschaft, och all eenzele Bierger kann eng Roll beim Kampf géint de Klimawandel spillen.
Jiddereen huet nämlech eng ganz Rei Stellschrauwen a senger eegener Hand fir säin Deel dozou bäizedroen, datt d'Äerderwiermung op 1,5 Grad limitéiert ka ginn, seet den Andrew Ferrone. Beispillsweis am Beräich vum Transport. Do hätt ee schliisslech d'Optioun vum gratis ëffentechen Transport, verschidde Leit kéinten och op Télétravail zeréckgräifen.
Och doheem ginn et wierksam Stellschrauwen
Energetesch Renovatioune vun Haiser wieren e weideren Usaz fir d'Emissioun vun Zäregasen ze reduzéieren. Wien eng Wärmepompel huet ass onofhängeg vu fossille Brennstoffer a gläichzäiteg och vun der enormer Präisdeierecht, déi den Ament bei dëse stattfënnt.
Doheem bidde sech awer nach weider Stellschrauwen, sou den Andrew Ferrone:
"Datt ee Saachen net lafe léist, wann ee se net brauch, respektiv vun den Temperaturen an den Haiser probéiert eventuell ëm een, zwee Grad d'Heizungen erof ze setzen."
E reduzéierte Fleeschkonsum reduzéiert Zäregasemissiounen
Nieft erneierbaren Energien an engem spuersamen Ëmgang domat, ass och e Wandel am alldeegleche Liewen noutwenneg. Ënnert anerem bei der Ernierung: Et kéint een zum Beispill säi Fleeschkonsum erofsetzen, dat géif Zäregasemissiounen erofsetzen.
Am drëtten Deel vun sengem Rapport huet de Weltklimarot IPCC festgehalen, datt fir d'Äerderwiermung op 1,5 Grad ze limitéieren, d'Emissioune vun Zäregase schonns bis 2030 missten ëm 43 Prozent reduzéiert ginn.
Méi zum Thema
Riicht Eraus
Klimawandel an extreem Wiederphenomener
Wéi een Undeel huet de Klimawandel un eenzelen extreeme Wiederphenomener? Déi däitsch Physikerin a Philosophin Dr. Friederike Otto ass eng Pionéierin vun dësem neie Fuerschungsberäich.
Weltwäit Zeeche vum Klimawandel
An enger neier Evaluatioun vum Fuerschungsstand kënnt d'UN-Gremium zur Conclusioun, datt déi vum Mënsch provozéiert Äerderwiermung quasi iwwerall op der Äerd éischt Spueren hannerléisst.
Meenung
Gleeft Dir schonn un de Klimawandel?
Dee vu Mënsche gemaachte Klimawandel gëtt haut kaum nach bezweifelt. Datt een eppes dogéint maache soll, steet dacks an der Zeitung. Wat dat alles bedeit, schéngt kaum verstanen, fäert de Jean-Jacques Rommes.
Batterien: Europäesch Industrie brauch weider Starthëllef
Bei Batterië fir Elektroautoe probéiert d'EU manner ofhängeg vum asiatesche Maart ze ginn. D'EU-Kommissioun muss séier Standarde fir d'Produktioun festleeën, seet den Energieminister Claude Turmes.
