Diskussioun ronderëm homeopathesch Mëttelen AMMD fuerdert Deremboursement vun homeopathesche Mëttelen

Sollen homeopathesch Mëttelen an Zukunft nach vun der Gesondheetskeess rembourséiert ginn? An eisen Nopeschlänner gëtt doriwwer diskutéiert. Frankräich huet rezent souguer en Deremboursement decidéiert.

Maxi Pesch / cz

Homeopathy
Foto: Bigstock / winistudios

Zu Lëtzebuerg wier dat den Ament keng Prioritéit, seet de Romain Schneider. Dem Minister vun der Securité sociale no maachen dës Remboursementer just e Brochdeel vun de Remboursementer vun der CNS aus.

Siwe Medikamenter ginn zu engem Taux vun 80 Prozent vun der Gesondheetskeess rembourséiert. D'Präisser vun dëse Medikamenter variéieren tëschent 1,34 an 9,27 Euro, sou de Minister. Am Ganze mécht dat ronn 52.000 Euro aus. Just ee Prozent vun den Assuréierte profitéiert dovunner.

AMMD: "Lëtzebuerg soll sech Frankräich uschléissen"

D'Doktesch an d'Zänndoktesch Associatioun fuerdert, datt Lëtzebuerg sech der franséischer Decisioun uschléisst. Déi franséisch Regierung hat rezent decidéiert, datt esou Mëttele vun 2021 un net méi vun der Gesondheetskeess rembourséiert ginn.

D'Effikassitéit vun der Homeopathie géif net op enger wëssenschaftlecher Basis berouen, dofir hätt Frankräich dës Decisioun elo geholl, seet de Generalsekretär vun der AMMD, de Guillaume Steichen. Fir d'AMMD ass et wichteg, datt d'Patienten an engem Gespréich mat engem Dokter hir gesondheetlech Problemer duerleeën. A just den Dokter kann hinnen dann eng optimal Prise en Charge ubidden.

D'Wierkung vun Homeopathie ass net mat physikalesche Gesetzer ze beweisen

Dem Dokter Paul Kohn no dierft een allerdéngs net alles an een Dëppe geheien. D'Wierkung vun der Homeopathie wier net mat physikalesche Gesetzer ze beweisen. De Paul Kohn ass ee vun de wéinegen Dokteren, déi sech zu Lëtzebuerg op d'Homeopathie spezialiséiert hunn. Hie schwätzt vun enger zweeter passiver Medezin.

Hie schwätzt vun "enger ganz einfacher" Medezin, déi en anere Prinzip hätt, wéi d'Schoulmedezin. "Et geet drëms de Kierper ze reizen, datt deen erëm selwer alles kann an Uerdnung bréngen. Well et an der Homeopathie manner Niewewierkunge géif ginn, wier dës Form vu Medezin heiansdo och "méi empfeelenswäert", wéi déi traditionell Schoulmedezin.

Et wier wichteg, d'Limitte bei der Homeopathie ze kennen. Fir de Paul Kohn dierften deemno nëmmen Doktere mat homeopathesche Mëttele schaffen.

Norméiere vun der Homeopathie?

"Ech fannen dat schrecklech, wann d'Leit zu mir soen Homeopath. Dat sinn déi, déi aus den Owescourse kommen a keng Ahnung hunn. Ech fanne wann dat richteg genormt wier, da wier ech Facharzt an der Homeopathie. Dat wier ech an Éisträich." De Paul Kohn ass der Meenung, datt d'Homeopathie doduerch eng aner Qualitéit géif kréien an eng aner Wierkung op d'Leit géif kréien.

Ee richtegen Debat doriwwer, wéi wierksam homeopathesch Mëttele sinn, an op se solle vun der Gesondheetskeess rembourséiert ginn, géif een an der Populatioun zu Lëtzebuerg awer net spieren. Do ware sech déi dräi Acteuren eens. D'Regierung wéilt d'Situatioun elo mol Ausland verfollegen.

An der Mediathéik:

Aktuelles / / Maxi Pesch
Lauschteren

Méi zum Thema

Zocker
Iessen a Gesondheet

Experte si sech eens: Zocker ass ongesond. Ass eng Zockertax dofir sënnvoll? Eng international Etüd mat Lëtzebuerger Participatioun ass där Fro nogaangen - an ass dofir an de südamerikanesche Chile gefuer.

Sexuell an affektiv Gesondheet
Sexualitéit

D'sexuell-geschlechtlech Vilfalt ass en transversaalt Thema. Den CESAS soll Informatiouns- a Sensibilisatiounsaarbecht zu affektiver a sexueller Gesondheet leeschten an en Netzwierk vun Acteure schafen.

Jill Sterba
Tiers Payant

Gëschter gouf d'Petitioun iwwert den Tiers payant System an der Chamber debattéiert. D'Dokteschassociatioun weist sech net begeeschtert. De Minister Romain Schneider wëllt mat der AMMD eng Léisung fannen.

Romain Poos
Tiers payant

De President vum Conseil supérieur vun de Gesondheetsberuffer fuerdert, datt an Zukunft déi héich Rechnunge vum Patient vum Tiers payant System iwwerholl ginn, dëst awer nëmmen zu engem Deel.

 

Net verpassen

  • Mam 100,7-Mikro ënnerwee

    Max Feyder

    Eise jonke Freelancer Max Feyder aka Skibi ass an den nächste Woche mam 100,7-Mikro ënnerwee, fir an der Strooss Stëmmungsbiller anzefänken an d'Leit no hirer Meenung zu bestëmmten Theemen ze froen.

Dossieren

  • Olympesch Spiller 2021

    D'Olympesch Spiller fannen, mat enger Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen