Amerikanesch Ekonomie Angscht virun enger Rezessioun an den USA

An den USA geet d'Angscht ëm, datt et geschwënn zu enger Rezessioun kéint kommen. En neie Sondage vun amerikaneschen Ekonomiste weist, datt 74 Prozent vun hinne sech eng Rezessioun virum Enn vum Joer 2021 erwaarden. Wall Street weist sech a leschter Zäit nervös, an d'Confiance vun den Amerikaner an hir eegen Ekonomie geet erof. Am Wäissen Haus ginn esou Ängschten awer séier rejetéiert.

Philip Crowther (Washington DC) / cbi

Den Donald Trump
Den Donald Trump gesäit keng Rezessioun. Foto: picture alliance/Pacific Press Agency/Lev Radin

Et ass bekanntlech d'Ekonomie, déi d'Neiwahl fir e President kann entscheeden. An der Wahlcampagne vum Bill Clinton 1992 war et ee vun de groussen interne Sloganen. "It's the economy, stupid" war d'Taktik fir géint den George H. W. Bush ze gewannen an hien no just engem Mandat ass dem Wäissen Haus se geheien. Eng Rezessioun war am Gaang, an d'Wahlequipe vum Demokrat Bill Clinton huet dovu profitéiert fir géint de Republikaner se gewannen.

Déi Erënnerunge kommen elo nees op am Wäissen Haus. D'Trump-Regierung wëllT, oder wollt, datt déi staark amerikanesch Wirtschaft am Virdergrond vun der Wahlcampagne 2020 steet. Elo vläicht manner, well d'Angscht virun enger neier Rezessioun an den USA geet ëm. Och wann de Chômage ënner dem Donald Trump weider erofgaangen ass, geet de Leit hir Confiance an eng stabil amerikanesch Ekonomie an déi selwecht Richtung.

Wäisst Haus: Fundament vun der Ekonomie ass staark

D'Wäisst Haus rejetéiert all Mentioun vun engem wirtschaftlechen Trend no ënnen. Dat neist Beispill ass dem Donald Trump seng Beroderin Kellyanne Conway, déi zwar begréisst, datt d'Medie sech fir d'Ekonomie ënner dem Donald Trump interesséiere géifen, mee "Dir maacht et just, wann Dir d'Rezessioun, d'Wuert vum Dag vun der Sesamstrasse, benotze kënnt."

D'Medie géife sech op "iergendeen Tweet" oder op de Wierder vun engem Ekonomist baséieren, "mee d'Tatsaach ass, datt d'Fundamenter vun eiser Ekonomie staark sinn, an dir wësst et." Et géife méi Leit schaffen, wéi zu all aner Moment an der Geschicht vun den USA.

Donald Trump: "Ech gesi keng Rezessioun"

De President huet vill Grënn sech iwwer de niddrege Chômage an alle Schichte vun der amerikanescher Gesellschaft ze freeën. Manner Afro-Amerikaner a manner Latinoe sichen no Aarbecht. Dovu schwätzt de President bei bal all Evenement. Elo probéiert hien d'Thema ze wiesselen, vun der amerikanescher op déi chinesesch Ekonomie:

"Ech gesi keng Rezessioun. D'Welt ass an enger Rezessioun. Dat ass vläicht e bëssen ze haart ausgedréckt, mee kuckt iech China un. Hinne geet et ganz schlecht. Ech hu grad gesinn, datt si hiert schlechtst Joer a 27 Joer haten, wéinst menger Politik. A si wëllen elo negociéieren. Hir Firmae verloossen d'Land. A si entloosse Millioune Leit, well si keng 25 Prozent u Stroftaxe bezuele wëllen."

Eng Rezessioun prognostizéieren ass schwiereg

Rezent Beispiller vu Rezessioun gëtt et der natierlech genuch. Do gouf et déi grouss Kris, déi während dem Enn vum George W. Bush senger Presidence ugefaangen hat a vum Barack Obama iwwerholl gouf.

Wéi déi éischt Indikatioune vun der Kris koumen, do huet de Larry Kudlow gesot, et géif net zu enger Rezessioun kommen. Firwat ass dat wichteg? Ma well hien elo den ekonomesche Beroder vum Donald Trump ass an nees, 12 Joer méi spéit, seet, et kéint net esou schlëmm kommen. Op NBC huet hie säi Feeler vun deemools bereit.

D'Wäisst Haus seet, datt d'Press responsabel ass fir d'Angscht virun enger neier Rezessioun. Déi vill demokratesch Presidentschaftskandidate kéinte vun enger schwaacher amerikanescher Wirtschaft profitéieren, mee dat kënne si natierlech ëffentlech net soen. De Slogan bleift dee Nämmlechten: et ass d'Ekonomie, déi alles entscheet.

An der Mediathéik:

Aktuelles / / Philip Crowther
Lauschteren

Méi zum Thema

Donald a Melania Trump um Wee op Dayton an El Pas
No zwee weideren Amokleef

​No den zwee Amokleef de leschte Weekend huet den US-President Donald Trump d'Stied Dayton an El Paso besicht. Vill Leit gesinn dem Donald Trump als Matschëllegen un. Den US-President gesäit dat anescht.

Donald Trump (Juni 2019)
US-Presidence

Virun 20.000 Supporter huet den Donald Trump annoncéiert, datt hie fir en zweet Mandat am Wäissen Haus kandidéiert. Hie wéilt weider "fir all Mann, Fra a Kand an dësem Land kämpfen".

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen