Däitschland Antisemittesch Virfäll an Däitschland

De Konflikt tëschent Israel a Palästina suergt och an Däitschland fir Tensiounen. An de leschten Deeg koum et a villen däitsche Stied net nëmmen zu Demonstratioune géint déi israelesch Politik, mee och zu antisemittesche Virfäll. Déi däitsch Politik wéist sech besuergt.

Max Tholl (Berlin) / cz

Policeauto virun enger Synagog
Foto: picture alliance / Daniel Kubirski | Daniel Kubirski

"Mir gesinn nees Saache vun deene mer eis net virstellen konnten, se nach eemol ze erliewen", seet den Abraham Lehrer, Vizepresident vum Zentralrat der Juden an Däitschland. Gemengt si verschidde Virfäll, déi sech an de leschten Deeg am Land ofgespillt hunn. Leschten Dënschdeg gouf zum Beispill eng Synagoge zu Bonn mat Steng beschiedegt, zu Münster a Solingen goufen israelesch Fändele verbrannt. Um Mëttwochowend haten 180 Persounen zu Gelsenkirchen virun enger Synagoge géint d'israelesch Attacken protestéiert an hei koum et der Police no zu kloer antisemitteschen Äusserungen. Och an anere Stied goufen antisemittesch Virfäll gemellt. Den Abraham Lehrer seet dat hätt näischt mat Israel-Kritik ze dinn, mee et wier pueren Antisemitismus. Den däitsche Staat an d'Gesellschaft missten dofir elo Faarf bekennen.

De Bundespräsident Frank-Walter Steinmeier mëscht dann och genee dat haut an der "Bild Zeitung". An engem Bäitrag seet hien, datt d'Grondgesetz zwar d'Recht op Meenungs- an Demonstratiounsfräiheet garantéiert, wien awer op de Stroossen Fändele mam Davidsstäer géif verbrennen an antisemittesch Äusserunge brëllen, géif net nëmmen d'Demonstratiounsfräiheet mëssbrauchen, mee sech och enger Strofdot schëlleg maachen, déi poursuivéiert muss ginn, sou de Bundespräsident. Juddenhaass - egal vu wiem - wéilt a géif een an Däitschland net dulden. Dem Staat Israel hat de Steinmeier seng onageschränkt Solidaritéit zougesot.

Méi Policeschutz fir jiddesch Ariichtungen

Den Antisemitismusbeoptraagte vun der Bundesregierung, den Felix Klein, erwaart iwwerdeems, datt den Konflikt tëschent Israel a Palestina zu weideren antisemitteschen Aktiounen an Däitschland wäert féieren. "Et ass leider e klassescht Muster, Judden an Däitschland dofir verantwortlech ze maachen, wat d'israelesch Regierung mécht - eng Regierung op där hier Aktioune si jo Kee Afloss hunn", sot hien dem "Redaktionsnetzwerk Deutschland". Dofir bréichten d'jiddesch Ariichtungen an Däitschland elo dringend méi Policeschutz. Den Armin Laschet, Ministerpresident vun Nordrhein-Westfalen an Kanzlerkandidat vun der Unioun, hat dat no de Virfäll an sengem Bundesland ëmgesat an betount, datt Antisemitismus an Däitschland keng Platz dierf hunn.

An de leschte Jore sinn antisemittesch Virfäll awer leider ëmmer méi heefeg ginn. Engem Rapport iwwert politesch motivéiert Kriminalitéit no, sinn antisemittesch Strofdoten am leschte Joer ëm 15,7 Prozent erop gaangen. Dës Attacke wieren awer quasi alleguer rietsextrem motivéiert gewiescht. Trotzdeem fäert d'Politik datt et nach zu weidere Virfäll kéint kommen, well an den nächsten Deeg op ville Platzen propalestinensech Demonstratiounen geplangt sinn. Elleng zu Berlin sinn fir dëse Weekend dräi Manifestatioune ugekënnegt.

Den däitschen Ausseminister Heiko Maas huet iwwerdeems d'Hamas wéinst hirem - Zitat - Rakeitenterror géint Israel schaarf kritiséiert a vun enger bewosster Eskalatioun geschwat. Am Interview mat der "Saarbrücker Zeitung" sot hien, béid Parteien missten sech elo nees schnell un de Verhandlungsdësch setzen.

An der Mediathéik:

Aktuelles / / Max Tholl
Lauschteren

Méi zum Thema

Jean Asselborn
Konflikt am Noen Osten

De Lëtzebuerger Ausseminister Jean Asselborn seet am 100,7- Interview, datt d'Diplomatie aktuell déi eenzeg Hoffnung wier fir eng Léisung am Israel-Palestina-Konflikt. De Jean Asselborn hofft, datt de Weltsécherheetsrot e Sonndeg eng Resolutioun wäert huelen.

Jean Asselborn, ministre des Affaires étrangères; Riad Malki, ministre des Affaires étrangères et des Expatriés de la Palestine
Walen a Palestina

De palestinenseschen Ausseminister Riad Malki war am Virfeld vun de geplangte Walen a Palestina op Aarbechtsvisitt zu Lëtzebuerg. Hie fuerdert d'international Gemeinschaft op, Drock op Israel ze maachen, fir datt d'Wale kënne stattfannen.

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

  • Resonanzen

  • On air

    Am Nomëtteg vun 3 bis 6

  • Panorama

  • Tockcity

  • The Benny Brown Show

Dossieren

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

  • Olympesch Spiller 2021

    D'Olympesch Spiller fannen, mat engem Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen