Déi éischt grouss Erausfuerderung vum neie Joer léisst net laang op sech waarden. Um Dënschdeg, 10. Januar wäert déi franséisch Regierung hir geplangte Rentereform presentéieren.
Pensiounsalter soll erhéicht ginn
E politesche Projet, dee schonn zanter Joren um Agenda steet a wuel zu der gréisster Muechtprouf vum Macron senger zweeter Amtsperiod dierft ginn. Op 65 respektiv 64 Joer soll Pensiounsalter erhéicht ginn, d'Gewerkschaften an d'Oppositiounsparteie strikt dogéint. Trotzdeem gesäit de franséische Politolog Christophe Boutin eng Méiglechkeet, wéi d'Reform déi néideg Stëmmen am Parlament kéint kréien: Les Républicains kéinten d'Regierung ënnerstëtzen.
Sollt sech keng Majoritéit fannen, kéint d'Regierung op den Artikel 49.3 zeréckgräifen, deen et hir erlaabt ouni Vott e Gesetz duerch d'Parlament ze boxen. Well d'Regierung keng absolut Majoritéit méi huet war si schonn zéng Mol op dëst Instrument ugewisen, wat och dëst Joer ëmmer nees am Raum dierft stoen an den Androck vun enger geschwächter Regierung vermëttelt, sou Christophe Boutin.
Migratiounsreform geplangt
En aneren Dossier deen dëst Joer sécherlech fir Diskussioune suerge wäert ass eng Reform vun der Immigratioun, déi et Migranten erliichtere soll, am Land ze schaffen. Awer och d'Expulsioun vu stroffällege Migrante soll acceleréiert ginn. Besonnesch de Rassemblement National dierft sech hei aschalten, esou d'Aschätzung vum Frank Baasner vum Deutsch-Französischen Institut. D'rietspopulistesch Partei géif d'Gesetz wuel stëmmen, awer signaliséieren, datt et net wäit genuch geet.
Zwielef spannend Méint stinn deemno am Hexagon un. Déi nächst Wochen kéinten schonn e klengen Virgeschmaach op dës liwweren.