Fräie Mikro Ausnamen

Schonn an den 80er Jore vum leschten Joerhonnert gouf et kloer, datt d'Industrialiséierung systemesch Risike schaaft, déi global sinn an onsiichtbar bleiwen. Den däitschen Soziolog Ulrich Beck hat dofir eegens de Begrëff vun der Risikogesellschaft erfonnt. An esou enger Risikogesellschaft gëtt den Ausnamezoustand zum Normalzoustand. Mee wat bedeit déi Normaliséierung vun der Ausnam fir d'Demokratie? Gedanken dozou vum Psychanalyst an Auteur Thierry Simonelli.

Thierry Simonelli / cbi

Meenung Thierry Simonelli
Den Thierry Simonelli ass Psychanalyst an Auteur . Foto: Archiv

Den 11. Mee 1968 hu sech 40.000 Mënschen zu Berlin versammelt fir géint déi deemools geplangten Noutstandsgesetzer ze manifestéieren. Ee vun de bekanntste Kritiker vun dëse Gesetzer, den Heinrich Böll, sot dozou an sengem Virtrag: "Opgrond vu mengen Erfarunge mat verschiddenen Noutstänn, sinn ech der Iwwerzeegung, datt Noutstänn [...] duerch Gesetzer net ze reegele sinn."

Ze gutt haten d'Leit deemools den Ausnamezoustand vun der "Reichstagsbrandverordnung" am Gediechtnes, mat deem e puer gewiefte Politiker d'Weimarer Republik an eng totalitärer Diktatur verwandele konnten.

Den Ausnamezoustand beim Carl Schmitt

Esou hat och den däitsche Staatsrechtler a Rechtsphilosoph Carl Schmitt den Ausnamezoustand geduecht. Déi biergerlech Gesellschaft, esou de Carl Schmitt, d'Gesellschaft vun der Riede- a Pressefräiheet, schéngt ze gleewen, datt Politik an déi ganz Gesellschaft eppes wéi e groussen Diskutéier-Club wier. Esou eng Gesellschaft ass awer dem Ausnamezoustänn net gewuess.

Wa séier muss gehandelt ginn, esou den Hitler-Unhänger Carl Schmitt, da muss déi gesamt bestoend Uerdnung vum Diskutéier-Club opgehuewe ginn. Am Moment vun der Kris muss d'Recht zerécktrieden, an de Staat d'Saachen eleng an d'Hand huelen. An deen Zoustand nennt de Carl Schmitt treffend "kommissaresch Diktatur".

An der kommissarescher Diktatur kann de Staat déi konstitutionell Grondrechter suspendéieren, fir se besser ze protegéieren; selbstverständlech!

De Carl Schmitt huet dat ganz kloer formuléiert: Diktatur ass de Contraire vun der Diskussioun. An dat heescht: déi kommissaresch Diktatur vum Ausnamezoustand ass de Contraire vun der Demokratie. E Contraire, wéi soll et och anescht sinn, mat beschten Absichten.

Der Demokratie eng Chance ginn

Wéi am Januar d'Epidemie a China lassgaangen ass, hu mer hei all selbstzefridde geschmunzelt, iwwer déi Aart a Weis wéi eng souverän Diktatur Millioune vu Leit ënner Zwangs-Quarantän gestallt huet. Mee et huet net laang gedauert, du war plëtzlech och fir eis, déi fräi westlech Demokratien, dat autoritäert China dat eenzegt denkbaart Virbild. Eleng déi kommissaresch Diktatur sollt och eis virun der Katastroph retten.

Mee hätt een net kënnen der Demokratie eng Chance ginn? Hätt een net kënne mat e puer Virschrëften, Empfeelungen an enger koherenter Informatiounspolitik sech der Verantwortung vun de Bierger uvertrauen?

Déi modern Demokratie war emol geduecht ginn, fir Fräiheet a Sécherheet mateneen ze verbannen. An déi Sécherheet sollt och vun Ufank un eng Sécherheet vun de Bierger virum Staat sinn. Dorunner gleeft haut anscheinend bal kee méi. Kee Politiker, a kee Wieler. Anscheinend si mer net kapabel op eis selwer an op déi aner opzepassen, ouni dat de Polizist mam Knëppel hanner eis steet.

Esou hu bal all d'Regierungen an Europa dat gesinn. An esou war och déi eestëmmeg an ausnamslos Iwwerzeegung vun all eisen Deputéierten hei zu Lëtzebuerg.

Soit: wann et drop ukënnt, da muss dat kanneregt Vollek mat strenger Hand vun e puer staarke politesche Féierer zu sengem Gléck a zu senger Gesondheet gezwonge ginn. An d'Vollek applaudéiert.


Mam Zil fir déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Themen ze kommentéieren. De Fräie Mikro ass e Gaaschtbäitrag mat Richtlinnen, am Respekt vun eisem Cahier des Charges, ënnert der finaler Responsabilitéit vum radio 100,7.

An der Mediathéik:

Fräie Mikro / / Thierry Simonelli
Lauschteren

Méi zum Thema

Thomas Koenig
Prisma

Virum Schicksal kapituléieren, senge Gefiller d'Kontroll iwwerloossen - oder léiwer awer eng Dosis Stoizismus? Gedanken zur individueller Krisebewältegung. Iwwerleeunge vum Thomas Koenig.

Wëssen an Onwëssen
Prisma

Ausgangspunkt ass en aktuellt Zitat vum Jürgen Habermas, no deem mir nach ni gezwonge ware mat esou vill Onwëssen Decisiounen ze treffen. Iwwerleeunge vum Philosoph Gilles Retter.

Net verpassen

  • 23.10. Riicht eraus mam Marc Giorgetti

    RiichtEraus_MarcGiorgetti_horizontal.jpg

    Mam President vum Groupement des Entrepreneurs geet et ëm d'Wunnengskris, déi geplangte Grondsteierreform a säi professionelle Parcours als Bauentrepreneur.

Programm

Dossieren

  • CinÉast 2021

    Et ass déi véierzéngt Editioun vum CinÉast Filmfestival. Vum 7. bis de 24. Oktober ginn Featuren a Kuerzfilmer aus Länner aus Mëttel- an Osteuropa gewisen. Siwe Filmer sinn an der Kompetitioun.

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen