Mat den Texter, esou wéi si bis viru kuerzem nach applizéiert gi sinn, wier de Bou iwwerspaant ginn, mengt de Marco Koeune, deen ee Bio-Betrib zu Harel an der Stauséigemeng huet.
A verschiddene Fäll keng Autorisatioune méi néideg
Bis ewell huet een a Gréngzonen eng Autorisatioun gebraucht, wann een zum Beispill Beiestäck oder Schiedhaiser fir d'Béischten opstellen, oder Photovoltaik-Anlagen um Dach installéiere wollt. D'Upassungsvirschléi gesi vir, datt dat an Zukunft ouni Accord ka gemaach ginn.
Ee wichtege Punkt fir d'Baueren Allianz ass och, datt ee viraussiichtlech och keng Autorisatioun méi bräicht, wann een Zären opstelle wéilt:
"Well grad am Geméisbau brauche mir Zären opgrond vun eiser Topographie a Wiederkonditiounen. A mir wëssen, datt mir do absolut defizitär sinn hei zu Lëtzebuerg. Dat heescht alles wat hei zu Lëtzebuerg produzéiert gëtt, ass am Fong schonn déi éischt dräi Wochen am Januar verzehrt. Alles wat een do méi ka maachen, ass natierlech gutt, soss musse mir aus dem Ausland importéieren."
Konstruktioune vu virun 1995 si "légalement existant"
Eng aner Neierung vun der Gesetzesännerung ass, datt Konstruktiounen a Gréngzonen, déi virum éischte Juli 1995 gebaut goufen, sollen als "légalement existant" ugesi ginn.
Fir Aarbechten un Haiser autoriséieren ze loossen, huet ee bis ewell bei allen Haiser bis d'Joer 1965 mussen noweisen, datt se legal gebaut goufen. Dat wier awer oft schwéier, mengt de Marco Koeune, deen och Schäffen an der Stauséi-Gemeng ass:
"Dono sinn déi Saachen dann och ze fannen, da sinn déi Saachen och méi digitaliséiert ginn. Sou dat dann och, soss ass ee jo mat engem Been am Prisong, wann een do een Dach wëll frësch maachen oder eppes wëll erneieren, geschweige denn nach Vergréisserungen. Also déi Saach gesi mer scho positiv, datt vereinfacht och déi administrativ Aarbecht fir Gemengen."
Deemno géifen déi geplangte Verännerungen net just der Landwirtschaft ze gutt kommen, mee wieren och fir d'Allgemengheet vun Interessi, mengt de Marco Koeune.
