ORK "Bei de Kannerrechter gëtt et an Europa nach Grenzen"

Den Ombudscomité fir d'Rechter vum Kand leet a sengem leschte Rapport de Schwéierpunkt op Kanner vu Frontalieren, vun Expats a vu Flüchtlingen. An dann och op d'Rechter vu mannerjärege Refugiéen ouni Begleedung. Ënnert anerem hir onsécher Zukunft wier eng grouss Belaaschtung, seet den ORK-President René Schlechter.

Michel Delage

René Schlechter
René Schlechter

Den Ombudscomité fir d'Rechter vum Kand ass eng onofhängeg Instanz, déi 2002 an der Suite vun der Kannerrechtskonventioun an d'Liewe geruff gouf. A sengem leschte Rapport geet den ORK méi spezifesch op déi international, grenziwwerschreidend Dimensioun vun de Kannerrechter an.

Eng ganz Rëtsch vu Recommandatiounen un d'Politik an d'Verwaltung am leschten ORK-Rapport bezéie sech op déi mannerjäreg Refugiéen ouni Begleedung. "Virun zwee, dräi Joer sinn der op ee Coup ganz vill op Lëtzebuerg komm", seet den ORK-President René Schlechter. Positiv wier, datt d'Regierung an Tëschenzäit ee Foyer op d'Bee gestallt huet mat enger permanenter Presenz, eppes wat de Standarde vum Kannerschutz hei am Land géif entspriechen. "Virdru waren déi Jugendlech dacks a grousse Foyeren, wou den Encadrement minimal ass, wann een d'Besoin vun engem Jonken, deen eleng ass, kuckt".

Wat geschitt nom 18. Liewensjoer?

Verbessere kéint een d'Offer fir déi therapeutesch Begleedung. Vill vun dëse Jonken hätte Schlëmmes erlieft. "D'Schwieregkeet ass, datt si dacks fäerte fir eppes ze soen, well alles wat gesot gëtt, op d'Wo kéint geluecht ginn." Eng weider Belaaschtung wier d'Onsécherheet vun dëse Jugendlechen a Bezuch op hir Zukunft, op d'Zäit nom 18. Gebuertsdag, wa si net méi automatesch kënnen hei bleiwen.

Wat Flüchtlingskanner betrëfft, déi mat hiren Elteren hei am Land sinn, recommandéiert den ORK ënnert anerem, datt dës Familljen d'Méiglechkeet kréien, selwer anzekafen an ze kachen. Fir de René Schlechter eppes Symbolesches, "well dat och e Stéck Autonomie, Selbstbestëmmung ass. Fir déi Populatioun ass et mat dat Schlëmmst, datt si friembestëmmt sinn, datt iwwert si decidéiert gëtt".

D'Situatioun vu verstümmelte Meedercher

Zu Lëtzebuerg huet een net seele mat Meedercher ze dinn, meeschtens aus afrikanesche Länner, där hir Geschlechtsorganer aus kulturellen Ursaache verstümmelt gouwen. Fir déi Professionell, déi sech ëm si bekëmmeren, wier et wichteg, gutt informéiert ze sinn, heescht et am ORK-Rapport. Dës Froe misste kloer gesetzlech gereegelt sinn.

Gläichzäiteg misst ee respektvollen Ëmgank mat deene Populatioune garantéiert ginn, "datt mir net op d'héicht Päerd klammen a soen: 'mir sinn ziviliséiert'", erkläert den ORK-President. De Problem wier, datt et sech ëm ancestral Praktike géif handelen, déi an de concernéierte Länner ganz déif géife sëtzen an trotz de gesetzleche Verbueter an dem Widderstand vun den Eltere géifen iwwerliewen.

Frontalierskanner a Brexit-Kanner

Den Ombudscomité fir d'Rechter vum Kand beschäftegt sech och mat der Situatioun vu Frontalierskanner. Dat betrëfft och Lëtzebuerger, déi wéinst méi niddregen Immobiliëpräisser déisäit der Grenz wunnen. "Si iwwerblécken dacks net, wat duerno nach op si duerkënnt un administrative Schwieregkeeten, u Kompetenzschwieregkeeten".

D'Rechter vun de Kanner wieren an de Brexit-Verhandlungen net déi éischt Prioritéit, gëtt de René Schlechter ze bedenken. "An dach huet dat herno wahrscheinlech een extremen Impakt op d'Liewe vun de Famillen, op d'Liewesplanung". Gespréicher mat der britescher Ambassade zu Lëtzebuerg hätten erginn, datt vill britesch Staatsbierger dowéinst wéilten déi Lëtzebuerger Nationalitéit kréien.

ORK brauch méi Mëttelen, Avant-projet de loi läit am Tirang

Gëtt den ORK vun der Politik gelauschtert? "Mir gi gelauschtert, awer mir maachen net genuch, fir de Suivi vun eise Recommandatiounen ze maachen", sou de René Schlechter. A sengem leschte Rapport beschwéiert sech den Ombudscomité fir d'Rechter vum Kand, datt een neien Avant-projet de loi, deen ëm méi Moyene soll ginn, bei der Regierung an engem Tirang läit.

Dat aktuellt Mandat vum ORK leeft Enn des Joers aus, déi nächst Mandatszäit vu fënnef Joer fänkt deemno nach ënnert dem ale Gesetz un. "Dat fanne mir immens schued", seet de René Schlechter. "Well dat am Endeffekt d'Institutioun Ombudscomité schiedegt". Deem Avant-projet de loi no soll den ORK statutaresch un d'Chamber gebonne ginn a méi personell Moyene kréien. Am Fong géif et ee politesche Konsens iwwert een neit Gesetz ginn, dat och am Regierungsprogramm virgesinn ass. De René Schlechter geet dovunner aus, datt dat an der éischter Hallschent vum nächste Joer awer iwwert d'Bühn geet.

An der Mediathéik:

Invité vum Dag / / Michel Delage
Lauschteren

Méi zum Thema

Laurence Bouquet, Dr Roland Seligmann, Pierrette Meisch
Riicht eraus

Kanner, déi Zeie vun haislecher Gewalt sinn, ginn net als Affer unerkannt. Dat muss sech änneren, fuerderen Associatiounen. Gewalt doheem géif méi wäit goen, wéi dat wat an offizielle Rapporte beliicht gëtt.

Programm

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Festival de Cannes 2019

    Alleguer d'Artikele vum Festival de Cannes 2019.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen