D'Drénkwaasser an Zäite vun Dréchent Bewosstsi fir d'Waasser als Ressource feelt

Dat waarmt Wieder beaflosst d'Drénkwaasserversuergung, soe Vertrieder vun der Waasserverwaltung. Laangfristeg gekuckt hannerléisst de Klimawiessel an deem Beräich awer och méi déifgräifend Spuren, zum Beispill um Niveau vum Grondwaasser.

Christiane Kleer / cbi

Wassersprinkler
Foto: Bigstock / N-sky

D'Drénkwaasser zu Lëtzebuerg kënnt zur Hallschent aus dem Stauséi an zur Hallschent aus Quellen, also dem Grondwaasser. Vun do aus verleeft de Wee bis an de Krunn iwwer d'Reservoire vun de Gemengen an de Waassersyndikater. Bei den aktuellen Temperaturen gesäit dat an der Praxis esou aus:

"Wa lo héich Consommatioune sinn, wann zum Beispill sou waarmt Wieder dobaussen ass, dat heescht wann d'Leit méi gläichzäiteg de Krunn opdréinen, da ginn och d'Infrastrukture vun de Gemenge méi héich beusprocht. D'Behältere lafe méi schnell eidel, déi Leitungen déi d'Waasser an d'Behältere bréngen, déi mussen dann och grouss genuch dimensionéiert sinn, fir datt se kënne Waasser noliwweren."

Dat erkläert den Tom Schaul. Hien ass studéierten Hydrogeolog a Vizechef vun der Divisioun Drénkwaasser a Grondwaasser bei der Waasserverwaltung. Seng Administratioun iwwerpréift de Moment a ganz enkem Kontakt mat de Gemengen an de Syndikater, wéi d'Situatioun evoluéiert. Wann do d'Reservoire bis op e gewësse Punkt eidel gelaf sinn, da gëtt Neies bei der Sebes ugefrot, respektiv d'Quelle ginn ugezaapt.

Momentan keng kritesch Lag

Fir de Moment ass d'Situatioun bei de Waasserreserven an der Rei, seet den Tom Schaul. Dat kann awer vun Dag zu Dag änneren. Et géif een dovunner ausgoen, datt proportional zu den Hëtzedeeg d'Consommatioun och géif eropgoen. Momentan géif een eng Tendenz no ënne feststellen, et wier awer nach keng kritesch Lag, esou den Tom Schaul.

Zu dësem Zäitpunkt huet also nach keng Gemeng hir Awunner missten opruffen, fir manner Waasser ze verbrauchen: an also d'Waasser vum Krunn net ze benotzte fir den Auto ze Wäschen oder matzen am Dag de Gaart de nätzen. Dat géif nämlech iwwregens och de Planzen näischt bréngen, sou den Tom Schaul:

"Well am Dag, wann d'Temperaturen an d'Sonnenastralung méi héich ass, dat Waasser wat de Planzen zougefouert gëtt, direkt verdonst, dat heescht, dat huet guer keng Chance an de Buedem eranzesickeren. Dat heescht, dat Waasser notzt am Fong de Planze guer näischt."

Tendenziell positiv ass, datt grad an dëse waarme Wochen och vill Leit an d'Ausland fueren - an also kee Waasser hei am Land consomméieren. Ob deen Impakt - och vun engem Congé collectif zum Beispill - awer wierklech antrëtt, bleift de Moment nach ofzewaarden.

Respektvoll mam Waasser ëmgoen

Drénken, spullen, wäschen, nätzen: an eise Regioune schéngt et méi wéi evident, datt d'Waasser leeft, wann een de Krunn opdréint, an datt dat Waasser och nach drénkbar ass. Mee sou evident wier dat awer net, seet den Tom Schaul. Ganz dacks géif de Leit d'Bewosstsi feelen, datt déi Waasserressourcë guer net esou onendlech sinn. "Dat hänkt souwuel vun der Quantitéit wéi vun der Qualitéit of", seet den Tom Schaul weider. Et hätt een an de meeschte Fäll zwar genuch Waasser, mee et wier awer eppes mat deem ee respektvoll misst ëmgoen.

Wat d'Reserven u Grondwaasser ugeet, sou steet Lëtzebuerg zum Beispill net excellent do. Et hätt ee Grondwaasserspigelen, déi déif sinn. "Si sinn net dramatesch déif, mee si sinn ongeféier op engem Niveau ukomm, wéi mir et 2006 bis 2007 haten", seet den Tom Schaul.

90 Prozent vun de Grondwaasserreserve befanne sech a Lëtzebuerger Sandsteen. Fir datt Grondwaasserreserve sech opbauen, ginn e puer verreente Méint net duer. Beschtefalls reent et e puer Joer hannerteneen ëmmer erëm vill, an zwar am beschten an der kaler Joreszäit. Do géif et manner Vegetatioun ginn, d'Waasser géif manner verdonsten a géif och méi den Ënnergrond infiltréieren. "Bis et awer an de Quellen ukënnt, dat kann tëscht engem bis zwee an zéng Joer daueren".

"Mir wëllen, datt et am Wanter vill reent"

Anescht ass dat beispillsweis am Stauséi, deem seng Reserve fëllen sech bei Reen direkt op. Beim Opbau vum Grondwaasser spillen awer och d'Verännerunge vum Klima mat eran - déi wäerten, dem Tom Schaul no, laangfristeg den Opbau vum Grondwaasser beaflossen.

"Et gëtt prognostizéiert, datt hei an eise Géigenden d'Vegetatiounsperiode sech géife verschiben. Doduerch, datt zum Beispill och d'Wantere méi waarm ginn, fänkt d'Vegetatioun éischter un. A wat mir éischter am Joer Vegetatioun hunn, wat och d'Gronwaasserneibildung wäert méi geréng ginn. Dat huet dann och een Impakt op d'Grondwaasserressourcen."

"Wa Mëtt bis Enn der Woch e puer Schauere sollen erofgoen, dann ass eis Hydrogeologen dat eigentlech egal", seet den Tom Schaul. "Mir wëllen, datt et am Wanter vill reent." Op laang Siicht huet d'Waasserverwaltung och en A op de Bevëlkerungswuesstem. Fir d'Reewaasserversuergung laangfristeg ze garantéieren, ginn et hei dräi Prioritéiten: de Grondwaasserschutz, d'Sensibiliséierung fir ee méi responsabelen Ëmgang mam Waasser, mee awer och d'Sich no neie Ressourcen. Dorënner kéint zum Beispill eng zweet Waasseropbereedungsanlang op der Musel falen. Entspriechend Etüde sinn de Moment am Gaang, sou den Tom Schaul.

An der Mediathéik:

Dossier vum Dag / / Christiane Kleer
Lauschteren

Méi zum Thema

Stuerm Blëtzer
Natur an Ëmwelt

Dat ass déi klassesch Fro, déi ëmmer erëm gestallt gëtt, wann d'Wieder verréckt spillt. De Jürgen Junk vum LIST an d'Christine Bastian vum Waasserwirtschaftsamt beäntwerten déi Fro mat engem klore Jo.

Eric Schauls
Biodiversitéit

Well d'Biodiversitéit weltwäit géif ofhuelen, wieren d'Liewensgrondlagen a Gefor. D'Zil dierft et engem UN-Rapport no allerdéngs net sinn, fir Ekonomie géint Biodiversitéit auszespillen, seet den Eric Schauls.

Programm

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen