Fënnef Ministeren hunn de Moien e Katalog vu 27 Mesurë presentéiert, fir de Kampf géint d'Drogekriminalitéit: Mesuren, déi de Regierungsrot virgëschter ugeholl hat.
D'Consommatioun an der Ëffentlechkeet bleift verbueden, grad ewéi de Verkaf. Am Stroosseverkéier soll weider eng Null-Toleranz gëllen.
Weider plangt d'Regierung eng "Décorrectionnalisation" vum Cannabis bis dräi Gramm. Wien an der Ëffentlechkeet mat bis zu maximal dräi Gramm erwëscht gëtt, muss een Avertissement taxé vun 145 Euro bezuelen. Et huet een dann 30 Deeg deen ze bezuelen, da wier d'Prozedur ofgeschloss an et géif näischt an de Casier kommen, esou d'Justizministerin Sam Tanson.
D'Amende pénale fir méi wéi dräi Gramm soll dann net méi tëschent 251 an 2.500 Euro leien, mee op 25 bis 500 Euro erofgesat ginn. De Produit géif an deem Fall vun der Police saiséiert a spéider zerstéiert ginn.
De Gesetzesprojet wëllt d'Justizministerin Ufank vum nächste Joer deposéieren. De Regierungsplang fir eng Cannabis-Liberaliséierung wier weider "à l'ordre du jour", esou d'Sam Tanson.
De Projet hätt ënner anerem wéinst der Pandemie Retard kritt. Och international hätten et Contrainte ginn, esou d'Ministeren haut virun der Press. Trotzdeem wier et wichteg en éischte Schrëtt an der Drogepolitik ze maachen fir d'Drogekriminalitéit an de Schwaarzmaart ze bekämpfen.