Et geet ëm ee Kollektivvertrag fir d'Joren 2023 bis 2025 fir iwwer 1.000 Leit Personal vun der Cargolux. Zënter dem leschte Juni ware 15 Verhandlungsronnen tëschent de Gewerkschaften an der Direktioun, erkläert d'Michelle Cloos vum OGBL. No iwwer sechs Méint Verhandlunge wier den OGBL zur Conclusioun komm, datt een op "deenen allerwichtegste Punkten" wäit vun engem Accord ewech wier an dofir hätt een als Gewerkschaft decdiéiert op d'Schlichtung ze goen.
Haaptfuerderungen: Salairesgrille, attraktive Lounmodell a Perspektiven
Déi zentral Fuerderung vun de Gewerkschafte si strukturell Gehaltserhéijunge fir d'Personal bei der Cargolux, esou de Paul De Araujo vum LCGB.
"Mat engem attraktive Lounmodell, och eng nei Salairesgrille fir d'Buedempersonal awer och ganz kloer, Karriäre mat Entwécklungs-Perspektive fir d'Personal."
D'Personal hätt déi lescht dräi Joer, wärend der Covid-Pandemie grouss Efforte misste maachen, a misst dat och am neie Kollektivvertrag unerkannt kréien, fuerdert d'Michelle Cloos. Et wier inakzeptabel, iwwer e Kollektivvertrag ze verhandelen, dee keng Erhéijung vun de Salairë géif virgesinn. "An dat ass fir eis een absolutten No-Go."
Gewerkschaftlech Aktiounen net ausgeschloss
Donieft verlaangen d'Gewerkschafte méi Stabilitéit bei den Aarbechtspläng, grad wéi eng laangfristeg Aarbechtsplazofsécherung bei der Cargolux.
LCGB an OGBL waarden elo op den éischte Rendezvous op der Conciliatioun. Wann ee keng Satisfaktioun kréich, da wier e bereet fir gewerkschaftlech Aktioune bei der Cargo-Airline, esou nach d'Michelle Cloos.
Direktioun hëlt Gewerkschaftsdecisioun zur Kenntnis
D'Cargolux hëlt d'Decisioun vun de Gewerkschaften zur Kenntnis, wéinst de Verhandlungen, déi no Meenung vun LCGB an OGBL gescheitert wieren, esou d'Direktioun de Mëttwoch Mëtteg op eis Nofro hin. D'Cargolux-Direktioun wier anerer Usiicht, an et géif eng aner Säit vun de Verhandlunge ginn, heescht et weider.
D'Cargo-Airline géif awer keng Kollektivvertragsverhandlungen oder eventuell Schlichtung iwwert d'Medie féieren, schreift d'Direktioun.