D'Reform vum Educatiounsministère gesäit vir, de Kanner an der Regelschoul en Encadrement ze bidden, vun deem och d'Kanner mat spezifesche Besoine kënne profitéiere. "D'Transitioun an den neie System geet net vun haut op muer. D'Personal muss drop virbereet ginn," erkläert d'Heelpädagogin Cathy Mangen. D'Angscht vun den Elteren, datt déi aner Kanner doduerch benodeelegt géinge ginn, wier verständlech. "Mä am Endeffekt ass et fir jiddereen e Gewënn. Et bedeit eng grouss Ëmstellung, ee Paradigmewiessel.”
Paradigmewiessel
D'ALCP sëtzt sech fir eng méi grouss gesellschaftlech Inklusioun an. D'Integratioun géif manner wäit goen. "Dat ass wéi een, deen zwar kann Deel un eppes huelen, mä net als gläichwäertege Member ugesi gëtt." Bei der Inclusioun soll de Mënsch als gläichwäerteg unerkannt ginn. E Wandel géif et och allgemeng an der Gesellschaft ginn. D'Leit géinge méi oppe mam Thema Behënnerung ëmgoen. Trotzdem géing et nach e grousse Wee ze maache ginn.
Ënnert Heelpädagogik versteet een, de Mënsch mat senge Beanträchtegungen z'akzeptéieren an him ze hëllefen, seng Plaz an der Gesellschaft ze fannen, seet d'Cathy Mangen. "Et geet net drëms eppes ze heelen." Zu Lëtzebuerg ginn et ronn 100 Heelpädagogen. E Studium fir Heelpädagogik gëtt et den Ament nach net hei am Land. "Mir bräichte méi Leit, déi sech an dem Beräich spezialiséieren."
Ënnert dem Wäert verkafen
De Beruff wier net genuch valoriséiert. Et géing eng Tendenz am Secteur ginn, fir déi passend Beruffsplazen u manner qualifizéiert Leit auszeschreiwen. "Dacks verkafen d'Heelpädagoge sech ënnert hirem Wäert."
