Staatsbeamten CGFP kritiséiert déi geplangte Reegelung fir Télétravail am ëffentlechen Déngscht

D'CGFP kritiséiert de Minister vun der Fonction publique op eng relativ sec Aart a Weis. An engem Communiqué huet d'Staatsbeamtegewerkschaft säi Projet fir eng Reegelung vum Télétravail am ëffentlechen Déngscht gëscht zimmlech zerrappt. De Marc Hansen reagéiert verwonnert. Et géif nach guer kee fäerdegen Text ginn, seet hien.

Maurice Molitor / cz

Romain Wolff

Lauschteren


Vu "bornéierter Hoerspléckerei" geet zum Beispill rieds am Schreiwes. Just fir ze soen, wéi een Toun d'CGFP do uschléit. Am leschten Accord salarial wier ofgemaach ginn, den Télétravail an engem Reglement grand-ducal ze reegelen, deen "an enker Zesummenaarbecht" mat der Gewerkschaft sollt ausgeschafft ginn. Mee elo géif deen Dialog scho bei elementaarste Punkten net klappen, sou de CGFP-President Romain Wolff. Wann et beispillsweis géif drëm goen, eng méiglech Zuel vu Wochendeeg am home office an den Text ze schreiwen. D'CGFP wëllt, datt wéinstens een Dag an d'Reglement geschriwwe gëtt, mee dat wier mam Minister Hansen net ze maachen.

Falsch, äntwert de Marc Hansen op Nofro hin. De Problem vun enger Zuel am Text wier, datt e Flexibilitéit ewechhëlt. Wann een Dag do stéing, géif dat der zwee oder nach méi d'Woch ausschléissen, sou argumentéiert de Minister. Méi sollt een dohannert net siche goen.

Bei der CGFP kléngt dat anescht. E weidere Kritikpunkt ass deen, datt Télétravail nëmme vun enger Adress aus méiglech soll sinn, der résidence habituelle. Dat géif awer net bei d'Realitéit an den Alldag vu Patchwork-Famillje passen, sou d'CGFP.

"Do gëtt vun enger fixer Adress geschwat, a bis elo hu mer och do net gemierkt, dass do e grousse Wëlle wär fir dorun eppes ze änneren."

Nach eng Kéier verweist de Minister drop, datt nach näischt fix ass. D'Verhandlunge wieren nach amgaang: "Mir hunn ofgemaach eis virum Summer nach eemol ze gesinn", sou de Marc Hansen.

Méi zum Thema

Aline Muller
Wëssenschaft

Déi héich Inflatioun kéint der Lëtzebuerger Ekonomie méi wéi doen, wéi d'Covid-Pandemie, seet d'Direktesch vum Fuerschungszentrum LISER. Elo wier een an enger Situatioun, wou d'Betriber riskéieren u Kompetitivitéit ze verléieren.

Télétravail
Home office

Déi bilateral Accorde fir den Télétravail vu Grenzgänger lafen Enn Juni aus - da gëllen nees déi al Seuilen. Wien an Zukunft reegelméisseg vun doheem wëllt schaffen, muss sech deemno am Viraus informéieren.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen