Et géif vun der Pandemie profitéiert gi fir verschidde Gesetzesprojeten duerchzesetzen, déi a Richtung Privatiséierung géinge weisen, kritiséiert d'CGFP.
Eng Partie Verwaltunge vun de Gesetzesprojete viséiert
D'CGFP annoncéiert an deenen Dossieren ee Litige. Dëst ënner anerem fir de Gesetzesprojet zur Nominatioun vu Lycéesdirekteren, deen den DP-Educatiounsminister Claude Meisch zeréckgezunn hat, oder a Saache privat Sécherheetsfirmaen am ëffentleche Raum.
Weider Verwaltunge wieren och viséiert, de Steve Heiliger, Generalsekretär vun der CGFP: "Wann d'Politik an esou enger wichteger Fro net op d'Demande vun der CGFP reagéieren ze mussen, dann ass dat fir eis, ganz ganz uerg. An dofir huet d'CGFP och decidéiert an dësem Dossier ee generelle Litige ze maachen, an da muss mat eis geschwat ginn."
De Sozialdialog géing net funktionéieren
Schaarf Kritik gouf et op der Comitéskonferenz vun der CGFP géint de Minister vun der Fonction publique, de Marc Hansen. Hien hätt d'Meenung an d'Propose vun der Gewerkschaft bei der Ëmsetzung vu Covid-19-Mesurë beim Deconfinement guer net an Uecht geholl. D'Verwaltunge géife keng eenheetlech sanitär Reegelen applizéieren.
Et feelt u Sozialdialog, esou de CGFP President Romain Wolff: "Eréischt wou déi dräi national representativ Gewerkschafte sech gemeinsam zu Wuert gemellt hunn, ass eppes geschitt. An engem Land, wou d'Regierung ëmmer nees behaapt, de Sozialdialog géing gutt funktionéiert, gëtt esou eppes kee Sënn."
Weider fuerdert d'CGFP d'Ofschafe vum Bewäertungssystem, dee bei der Reform vun der Fonction publique ageféiert gouf, d'Ëmsetze vum Accord salarial an deene verschiddene Verwaltunge vum Staat oder nach eng nei Reegelung fir den Teletravail.