D'Chamber géif riskéiere fir net méi beschlossfäeg ze sinn, wann ze vill Deputéiert a Quarantän sinn, erkläert de Laurent Scheeck. Schaltunge sollen awer just fir d'Dauer vun der Corona-Pandemie méiglech gemaach ginn, esou de Laurent Scheeck, an déi genee Reegelen dofir missten nach an der zoustänneger Chamberkommissioun festgehale ginn.
Esou Pläng hätt ee schonn iwwer Méint studéiert, seet de Generalsekretär vun der Chamber.
"Mir hunn awer wärend dem Etat de crise dovun ofgesinn op déi Schinn ze goen, well mer zu där Zäit fonnt hunn, et wier wichteg, datt d'Chamber physesch visibel ass, an datt d'Deputéiert zesummen an engem Raum sinn, fir esou wichteg Gesetzer wéi d'Covid-Gesetzer, ze stëmmen."
D'Kris géif sech elo awer an d'Längt zéien, an et géif de Risiko ginn, datt een oder méi Deputéiert a Quarantän sinn - et bräicht een awer e Quorum vun 31 Deputéiert, datt Gesetzer kënne gestëmmt ginn.
D'Chamber géif deemno kucken, wéi een dat technesch kéint ëmsetzen, mee och wéi dat vun der Constitutioun hir méiglech ass - och d'Chambersreglement misst dofir adaptéiert ginn.