#Chamberleak Chamberleak: Enquête nach net ofgeschloss
Ee Joer no de Chamberleaks ass d'Enquête vun der Justiz nach net ganz ofgeschloss. Dat sot eis de Justizspriecher Henri Eippers op Nofro hin. Virun engem Joer hat dëse Radio op Sécherheetsproblemer um Internetsite vun der Chamber opmierksam gemaach.
D'Chamber hat doropshin d'Justiz ageschalt. Géint zwee Journaliste vun dësem Radio leeft zanterdeem eng Enquête vum Untersuchungsriichter Ernest Nilles. De radio 100,7 krut vun der Chamber informatesch Intrustioun virgeheit.
An der Chamber gëtt et awer eng nei Entwécklung: D'Chamber huet fir déi informatesch Sécherheet eng Partnerschaft mam staatleche CTIE decidéiert. Dat confirméiert am Gespréich mam Jean-Claude Franck de Chamberpresident Fernand Etgen.
Erklärunge vum Chamberpresident Fernand Etgen
De CTIE huet méi Erfahrung wéi d'Chamber, seet de Chamberpresident. De staatlechen Informatikdéngscht wier eng grouss Struktur mat e puer honnert Mataarbechter. D'informatesch Sécherheet wier e Beräich dee séier evoluéiert. "Méi eng kleng Struktur wéi d'Chamber kann do eleng net ëmmer erëm à la pointe du progrès sinn", sou de Chamberpresident.
De kompletten Interview mam Chamberpresident
Den Informatikservice vun der Chamber géif trotz enger Collaboratioun mam CTIE weider ganz gebraucht ginn. E misst souguer weider ausgebaut ginn. D'Chamber hätt an der Suite vun de Chamberleaks déi informatesch Sécherheet vun der Chamber verbessert. "Besonnesch bei der Problematik vun der duebeler Authentifikatioun gouf et nach Handlungsbedarf."
A genee do soll de CTIE hëllefen. Déi schrëftlech Konventioun tëscht den zwou Säite géif sou séier wéi méiglech ausgeschafft ginn. Datt de Staat an d'Legislativ zesumme schaffe wier kee Problem fir d'Trennung vun de Pouvoiren. De Fernand Etgen ass awer zouversiichtlech, datt d'Chamber déi néideg Garantië kritt, datt "keen Abus vun Donnéeën a keng Richtung" kéint geschéien.
Hie geet dovun aus, datt d'Partnerschaft tëscht der Chamber an dem CTIE nach dëst ka Joer finaliséiert ginn.
Méi zum Thema
Chamberleak: Chamber iwwerhëllt voll Responsabilitéit
Véier Méint no de Chamberleaks huet d'Chamber decidéiert hir Informatik ganz nei opzebauen. Dat huet d'Chamber de Freideg virun der Press matgedeelt. Domat ginn d'Recommandatioune vu staatlechen a privaten Experten ëmgesat.
#chamberleak
Um Internetsite vun der Chamber waren eng ganz Partie intern a sensibel Dokumenter net adequat geséchert. Duerch d'Editéiere vu Weblinken konnten déi vertraulech Informatioune mat engem normale Webbrowser ofgeruff ginn.
