Offallgesetz Chambre des métiers fuerdert Ännerungen u Gesetzesprojeten

Lauschteren

Den Ëmweltministère huet am Projet de Loi iwwer d'Verpackungen ënner anerem ee Vidangesystem virgesinn. Vum nächste Joer u sollen och Uebst a Geméis net méi a gratis Barquetten oder aner Verpackunge aus Plastik verkaf ginn. Fir den Ament wier een nach net prett fir déi Moossnam ëmzesetzen, seet d'Handwierkerkammer.

Ekologesch sënnvoll Alternativen zum Plastik

Verpackunge fir Liewensmëttel musse jee no Contenu Krittären erfëllen, fir déi een ekologesch sënnvoll Alternative muss fannen, betount d'Anne Majerus, technesch Beroderin vun der Handwierkerkammer.

Plastik kéint een zwar einfach recycléieren, mee wann et sech ëm plastifizéierte Kartrong handelt, wier dat méi schwiereg. Et misst een de Betriber dofir Zäit gi fir ekologesch sënnvoll Alternativen ze fannen.

Vidangesystem: Bedenke vun der Chambre des métiers

Kritesch ass d'Handwierkerkammer och vis-à-vis vum geplangte Vidangesystem, dee méi wäit geet ewéi dat, wat an Däitschland de Fall ass, seet d'Anne Majerus. Vill Gedrénks, dat zu Lëtzebuerg kaaft gëtt, géif net hei am Land produzéiert oder agefëllt ginn.

D'Fro géif sech stellen, ob déi Fläschen dann alleguerten op eng zentral Plaz geliwwert misste ginn, wou se dann etikettéiert ginn. "Wier dat ekologesch da sënnvoll?", freet d'Anne Majerus.

Kleng Geschäfter misste bei engem Vidangesystem och eng Plaz virgesinn fir déi Verpackungen ze stockéieren.

Schwiereg ëmsetzbar wier den Asaz vun Mehrwegverpackungen fir verschidde Metieren. D'Anne Majerus gëtt d'Beispill vum Bäcker, wou een da misst d'Tut vun de Bréidercher extra bezuelen, wärend een am grousse Supermarché d'Tut vun de gefruere Bréidercher net misst extra bezuelen.

Beim Aféiere vun Verpackungs-Sammelplazen nom Model vum Pilotprojet um Houwald ass d'Handwierkerkammer net strikt dogéint. Nach misst een déi Moossnam an der Praxis kënnen ëmsetzen.