Chamberwahlen 2018 Wat zitt e Meenungsfuerscher an d'Politik?

De Charel Margue war dee Mann, deen eis jorelaang d'Sondagen erkläert huet. Hie war gewëssermoossen d'Gesiicht oder d'Stëmm vun TNS-Ilres. Mee domat ass elo Schluss. De Charel Margue huet decidéiert, mat deene Gréngen an d'Chamberwahlen ze goen, an esou eng Kandidatur ass mat der Aarbecht als Meenungsfuerscher net kompatibel. Zanter Enn Abrëll ass hien dofir fräigestallt.

Maurice Molitor / cz

Charel Margue
Charel Margue

De Charel Margue, grénge Kandidat bei den nächste Chamberwahlen am Zentrum, hofft drop, datt déi blo-rout-gréng Regierung hir Aarbecht nach fënnef Joer weiderféiere kann. Fënnef Joer géifen net duergoen, fir alles duerchzesetze wat ee sech virgeholl hätt. Hien hätt schonn an de 70er Jore bedauert, datt déi deemoleg blo-rout Koalitioun hiert Mandat net verlängert krut, sou de Charel Margue. De Fils vum laangjärege CSV-Deputéierte Georges Margue, dee virun allem als Gesiicht vun TNS-Ilres bekannt ass, betount, seng Decisioun, fir mat an d'Wahlen ze goen, wier gefall éier Viviane Loschetter a Claude Adam hire Réckzuch ugekënnegt hätten. Hien huet awer zouginn, datt dat seng Chancen an d'Parlament ze kommen natierlech verbessert.

Schlecht Campagne fir Referendum

De Referendum 2015 hätt eng aner Dynamik kritt, wann d'Fro vun der Trennung tëscht Kierch a Staat awer gestallt gi wier, seet de Charel Margue. De fréiere Meenungsfuerscher bei TNS-Ilres geet jo fir déi Gréng mat an d'Chamberwahlen an ass dowéinst elo net méi beim Sondage-Institut. Als Meenungsfuerscher hätt hien, anescht wéi vill Politiker, méi eng laangfristeg politesch Vue, sou de Charel Margue. Hie wier 2015 och un déi dräi Säite vun der Koalitioun erugetrueden, fir iwwer d'Referendums-Campagne deemools ze schwätzen.

Hien hätt sengen Oueren net getraut, wéi hie gesot kritt hätt, "dräi Méint Campagne geet duer", sou de Charel Margue. "Ech hunn dat zimlech skandaléis fonnt, an dat fannen ech haut och nach." Domat hätt déi aktuell Dräier-Koalitioun de Referendum vermasselt. Bei sou enger Fro hätt ee minimal ee gutt Joer Diskussioun missten arechnen, fir jiddweree mat an d'Boot ze kréien a fir datt jiddweree seng Entscheedung "en âme et conscience" huele kann.

De Charel Margue ass awer der Meenung, datt d'Dräier-Koalitioun sollt weidergeféiert ginn, well fënnef Joer net laang genuch wieren, fir alles ëmzesetzen, wat ee sech virgeholl huet. Iwwer d'CSV sot hien, et wier eng Partei, déi, Zitat, "vun uewen erof géif decidéieren", an déi der konservativer Lëtzebuerger-Gesamt-Psychologie géif entspriechen.

Schwéierpunkt Sozialpolitik

Den Dossier, an deen hie sech besonnesch eraknéie wéilt, wann e sollt gewielt ginn, wär d'Sozialpolitik, seet de Charel Margue.

Tëschent zéng a 15 Prozent vun de Leit hei am Land géif et net gutt goen. "Am Rifkin-Prozess ass eppes am Gaang verluer ze goen, dat ass "Nobody left behind", wéi de Rifkin et selwer gesot huet", sou de Charel Margue. Vill Leit géif et och besser goen, mee d'Schéier tëscht aarm a räich geet weider op. Déi sozial Fro, an och alles, wat d'Ëmverdeelung, d'Gerechtegkeet ugeet, dat ass fir mech, an enger Nohaltegkeetsperspektiv de Schwéierpunkt.

Firwat déi Gréng an net CSV?

De Charel Margue, dee virun allem als Gesiicht vun TNS-Ilres bekannt ass, wëllt eng schwaarz-gréng Koalitioun dofir awer net ausschléissen - aus "pragmatesche" Grënn. Am Interview huet de Fils vum laangjäregen CSV-Deputéierte Georges Margue och erkläert, firwat hien d'Partei vu sengem Papp net seng politesch Heemecht kéint sinn.

"An där Partei gi Dir, mat Positioune wéi mengen, marginaliséiert." Vu bausse géif ee méi Gehéier fannen an och méi Drock op ee gemaach kréien, wéi vu bannen. An der CSV wieren déi rietsliberal, ekonomesch liberal Kräften "einfach ze grouss".

An der Mediathéik:

Lauschteren

Méi zum Thema

Claude Adam
Chamberwahlen 2018

Dem Claude Lamberty seng Ausso, datt déi gréng sech géife fir Fliedermais an d'DP fir de Mënsch asetzen, wier e "Frontalugrëff". Dat seet de grénge Claude Adam, deen am Abrëll an der Chamber ophält.

Laurent Moyse Meenung
Fräie Mikro

Dëst Joer ass nees e Wahljoer an dat mierkt een elo schonn. Déi perséinlech Ambitioune gi méi däitlech. D'Nervositéit klëmmt, d'politesch Aussoe gi méi spatz, an d'Muechtverhältnisser réckelen ëmmer méi no vir.

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen