Corona-Pandemie CHL: Servicer kéinte geschwënn nees ëmorganiséiert ginn

Den Direkter vum Stater Centre Hospitalier seet, d'Situatioun an de Spideeler wier "ugespaant". Am Moment wier zwar nach kee "Katastrophen-Zenario" ofzegesinn, esou den Dr. Romain Nati. D'Zuel vun de Covid-Patienten am CHL hätt sech iwwer de leschte Mount awer méi wéi vervéierfacht, a si wier weider amgaang an d'Luucht ze goen.

Rick Mertens (Interview) / Claude Biver (Web)

Romain Nati
De Romain Nati ass Direkter vum CHL

D'Zuel vun den Hospitalisatioune géif "lues awer sécher" eropgoen. Momentan wieren am CHL - Stand Sonndeg - 27 Patiente wéinst Covid-19 hospitaliséiert, virun engem Mount wieren et der just sechs gewiescht. "Dat ass méi wéi eng Vervéierfachung."

De Romain Nati geet dovunner aus, datt den CHL 40 Covid-Patiente kéint behandelen, ouni Restriktiounen an anere Servicer mussen ze maachen. Den Direkter vum CHL fënnt et net onwarscheinlech, datt dës Zuel an den nächsten zwou Wochen erreecht kéint ginn.

Méiglech Ëmorganisatioun am CHL

Sollte méi wéi 40 Patiente wéinst Covid-19 am CHL sinn, missten d'Servicer vum CHL nees ëmorganiséiert ginn. "Do hu mer Pläng am Tirang, fir wann de Contingent vun de Covid-Patienten méi grouss gëtt, fir dann och dem Defi kënne gerecht ze ginn."

Dës Pläng géifen enger "gewësser Flexibilitéit" Rechnung droen, seet de Romain Nati. Et géif eng streng Trennung tëschent Covid-Patienten an deenen anere ginn. Wann d'Zuel vun de Covid-Patienten weider klëmmt, "da musse verschidde Servicer fir déi Patiente reservéiert ginn." Et wéilt een, souwäit et geet, net-Covid-Patienten awer weider esou behandelen, wéi dat bis elo gemaach gouf.

De Risiko vu Personalmanktem

Den Direkter vum Stater Centre Hospitalier seet, an de Spideeler géif am Moment genuch Material zur Verfügung stoe fir Covid-Patienten ze behandelen. Hie géif sech keng Suerge maachen, datt d'Beootmungsgeräter an nächster Zäit kéinte knapp ginn, esou de Romain Nati.

Den CHL-Direkter fäert awer, datt et beim Personal kéint zu Engpäss kommen: "do si mer limitéiert". Sollten d'Zuele vun den Neiinfektioune weider an d'Luucht goen, géif ee riskéieren, datt Problemer optrieden, notamment, datt net genuch Personal do ass fir souwuel Covid- wéi och net-Covid-Patienten ze behandelen.

An der Mediathéik:

Invité vum Dag / / Rick Mertens
Lauschteren

Méi zum Thema

Paulette Lenert a Xavier Bettel
Nom Regierungsrot

D'Regierung huet nom aussergewéinleche Regierungsrot um Samschdeg keng nei Restriktioune fir d'Horesca oder de private Beräich decidéiert. D'Entreprisë solle weider op Télétravail zeréckgräifen.

Corona-Test Analys
Infektiounszuelen

Den Taux d'incidence an de Positivéitstaux sinn zu Lëtzebuerg sinn nees geklommen. An de leschte sechs Deeg ass den Taux vun den Neiinfektioune pro Woch a pro 100.000 Awunner nees vu 66 op 86 geklommen.

 

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen