Mat der Coolchain Association wéilt een d'Liewensmëttelverschwendung op alle Niveaue reduzéieren, well d'Wueren, d'Geméis, d'Uebst an d'Fleesch vun ëmmer méi wäit kommen misst een déi ganz Killketten ënner d'Lupp huelen, sou de Philippe Schuler. Verschidde Länner hätten net déi richteg Infrastrukture fir d'Killketten ouni Ënnerbriechung kënnen ze garantéieren. "Wann d'Uebst vu méi wäit kënnt besteet ee Problem fir d'Qualitéit ze erhalen. A ville Fluchhäfe géifen déi néideg Infrastrukture feelen. An Afrika ginn et vill Problemer fir d'Wuer vum Bauer bis bei de Fluchhafen ze féieren."
Zesumme schaffe fir no Léisungen ze sichen
D'Coolchain Association schafft mat verschiddenen Acteuren zesummen, dat heescht Fluchhäfen, d'Fluchgesellschaften, Entreprisë wéi Dupont de Nemours déi probéieren an där Killkette mat ze schaffen. D'Zil wier et Daten ze sammelen iwwer d'Temperatur am Fliger oder am Fluchhafen. Iwwer dee Wee kéint een erausfanne wou d'Schwankungen hir kommen, esou de Philippe Schuler. Ënnerbriechungen an der Killkette wieren de gréisste Problem, dës géifen dacks zu Liewensmëttelverschwendung féieren. "D'Qualitéit déi am Supermarché misst garantéiert ginn, geet da fir d'Läit net méi duer", seet de Philippe Schuler. D'Zesummenaarbecht a virun allem d'Aféiere vun engem Standard, dee beschreift wéi eng Temperatur fir wéi eng Wuer déi richteg ass, wieren dofir wichteg.
Wichteg wier et datt Privatstéit déi Produiten, nom Akafen, sou séier wéi méiglech an de Frigo bréngen an datt se déi Wueren net laang am Auto leie loossen.
Lokal Produite consomméieren?
Natierlech wier lokal kafen ëmmer gutt. Et wier een awer an enger Zäit ukomm, wou all Haushalt eben déi selwecht Geméiszorten dat ganzt Joer laang wëllt, betount de Philippe Schuler. Dofir misste Saachen erageflu ginn. "Et ass da schwéier ze soen, mir musse lokal akafen."
"Wat ech ganz wichteg fannen ass datt d'Läit sech bewosst ginn, vu wou d'Liewensmëttel hir kommen, datt mer de Respekt virum Iesse weisen an datt mer wësse wéi vill Ressourcen am Iessen dra stiechen. Datt d'Privatstéit esou vill ewechgeheien, weist datt een de Respekt virun de Liewensmëttel verluer huet."
All Acteuren zesummen un een Dësch
D'Coolchain Association wëllt mat all den Acteuren zesummeschaffen. Déi verschidde Frachtgesellschafte wéi d'Cargolux, Fluchhäfen a Supermarchéen, grad wéi d'Bauere wëllt een zesummen un een Dësch kréien fir driwwer ze diskutéieren, wéi eng Standarde gebraucht gi fir déi Killketten net ze ënnerbriechen. Et wier och wichteg Analysen duerch ze féieren, fir eraus ze fannen wéi eng Temperaturen optimal fir d'Geméis, d'Uebst an d'Fleesch sinn. Dono kéint een Infrastrukture schafen, déi d'Killkette kënne garantéieren.
"Déi ganz Installatioune ginn haut opgeriicht fir Medikamenter kill ze lageren. Mais fir Uebst a Geméis ass dat op deene Fluchhäfen nach ëmmer net de Fall. Ech mengen duerch de Klimawandel an d'Liewensmëttelverschwendung ass et ëmmer méi wichteg doriwwer ze schwätzen an eppes dogéint ze maachen", seet de Philippe Schuler.